Ka Regional Committee pynbait pood ka Assam wa Meghalaya da chong yachem ko hei sien nyngkong ynne ka sngi ha Shillong wei kani ka Regional Committee toh neibynta u pynbait ya u pood ha Psiar-Khanduli ka West Jaiñtia Hills District waka West Karbi Anglong District, Hamren, Assam.
Ya kani ka yalang da pynlai da u Sniawbhalang Dhar, Montri ka chnat Urban Affairs Meghalaya wa u Piyush Hazarika, Montri ka chnat Information and Public Relations ka Assam.
Ha ini i yaklam waroh arliang da pynsñiaw ki yei yong ki heiyatoh wa kini ki thaw wa ya kajia pood wei da mynjur leh wow lai hiar cha kini ki thaw deilang wa ki Montri Rangbah ki ar jylla.
Hawa khana kammon lai ka yaklam, u Sniawbhalang Dhar da ong u wa ymem yaklam deiwa e kylliang yei thaw i bhaw tangwa deiwa lai cha kini ki thaw yow ap yei sñiaw kiwa chong chnong wei daw pynbait yeini deiwa ya pynhun ya waroh ar liang.
Chooh chooh da ong wa ka Regional Committee da rai ko wow phah ya ka Report cha jar jiar ki sorkar ha u Naisaphra. Yow ye u leh yeini, daw lai cha kini ki thaw chwa u kut uni u bnai lane ha u bnai wow wan deiwa emlang ki Montri Rangbah.
Hawa jubab yei kynaad wa da mih ha kini ki thaw khappood wa da sdang da ka Assam, neiliang u Chairman ka Regional Committee na Assam, u Piyush Hazarika da ong u wa ym em iwon iwon i sdang yei pynthut na Assam wei kitu kiwa sdang yei kulmar ymtoh kiwa chong chnong ka Assam. “I toh ki bru wa bha, i yatoh lok bha i wa ka Meghalaya wei ymem i iyi iyi i thmu wa sih wei kitu kiwa sdang yei kulmar ymtoh kiwa na i.”
U Piyush da sñiawskem u leh wa ka sorkar Assam wa Meghalaya wa katni daw ye ki wow pynbait ya ini i kajia pood wa da sah da slem dei suk dei saaiñ ha i por wa tbian.
Da pyntip leh wa ka Regional Committee daw yachem biang ko ha u bnai wow wan.
