Ka yung krehkaam yong u District Mission Coordinator, Samagra Shiksha Abhiyan East Jaiñtia Hills District, Khliehriat da pynman ko ya ka Jan Bhagidari kawa man kam chibynta ka G20 ha ka 13 tarik uni u bnai ka Khliehriat West Community Hall.
Da ya emlang ha kani ka sngi wa u A. Nongbri, MCS, Addl. Deputy Commissioner ka East Jaintia Hills District kam u kongsan uwa da pynchlur ya ki khynnah skur wow kreh chitom ha ka puræ puthi wei kamjooh leh wow pynpliah ya idæ kawa yatoh wa i sap i phong wa em ki.
Ha kani ka sngi da khut sñiawbha hadooh 20 tylli ki skur wow ya chimbynta heiwa da pynman leh ya ka yakob chaad tynre, i chna tiar (Arts & Craft), ka yakob chna tiar yow yarap hikai (Teaching Learning Material), ka yakob dro dur ha ki chram (Wall Painting) wa i khana parom tbian hajrong ka G20.
Yei naam jop ha i chaad tynre da jop da ka Moolimen RMSA Secondary School, Sakhain hei wa ar da yoh ka Ambrose Memorial Secondary School, Khliehriat wei ha ka kyrdan wa le da yoh rah da ka Sutnga RMSA Secondary School, Sutnga.
Hawa yatoh wa ka yakob dro dur ha chram skur, da yoh rah yei naam jop da ka Star Public School, Lumshnong wei da bood wa ar da ka Ambrose Memorial Secondary School, Khliehriat wei hei wa le won da ka Khatsoo Ri Pnar Brightstar Secondary School, Dkhiah.
Ha ka yakob chna tiar da yoh rah yei naam jop da ka Moolimen RMSA Secondary School, Sakhain hei wa ar da yoh ka Sutnga RMSA Secondary School, Suntga wei hei wa le da yoh ka Lumjingshai Secondary School, Tluh.
Hawa yatoh won wa i yakob chna tiar hikai, da yoh rah yei naam jop da ka Star Public School, Lumshnong wei bood sa ka Little Star Secondary School, Lad Rymbai hei wa ar katwa ka Ambrose Memorial Secondary School, Khliehriat won hei wa le.
Da pynlai ya ka yalang da u Salanbor D Kamar, District IE Coordinator, East Jaiñtia Hills District, Khliehriat wei da pynkut ya ka yalang da ki kyntien khublei na ka Manbha Suja, District Pedagogy Coordinator, East Jaintia Hills District, Khliehriat.
