Tkoh i krehkaam ka JHADC wym pynlait ka sorkar ya ka bhah poisa wa palat T. 74 klur

Ynne u CEM ka JHADC, u Thombor Shiwat neibynta ka Jaiñtia Hills Autonomous District Council (JHADC) da e u ya ka dorkhat ha u Symbood Montri Rangbah ka jylla, u Sniawbhalang Dhar wow pynsñiaw cha ka sorkar heiyatoh wa i chitom wa chem ka Council neipor cheipor.

Ha ka dorkhat da kdaw wa ka JHADC da chem chitom bha ko heiyatoh wa ka poisa poilaiñ heiwa da kdaw wa ka bhah (Shares on Royalty) yong ka na ki mar pohkhyndaw (Major & Minor Minerals) wa da yabhah 60:40 hapyrdi ka sorkar wa ka Council heiwa na ini 80% da pynlut ka Council cha ka tulop kiwa kreh tangwa ha ki snem wa dadep ka sorkar jylla da pynslem ko wow pynlait ya kani ka bhah iwa da ktah ya ka yarong poisa ka Council iwa da ktah won ya ka tulop kiwa kreh, ki MDC wa kiwa da chong-ngiah.

Da kyntu ya oo wow pynsñiaw cha ka sorkar wa hadooh ka 31 Wisu 2023 ka bhah wa toh u yoh ko na ka sorkar da kynjoh ko T. 74.02 klur (wa kynthup ya ka dan ki mar pohkhyndaw wa ka dan yong ki kari) iwa kynthup leh ya ka bhah wa sah na u 2021-2022 iwa man T. 3.58 klur deiwa kyrpaad wow pynlait noh ka sorkar ya kani ka bhah chwa u Naiynñiaw uni u snem khnang wow ye u pyndep ya ka hukum ka High Court ka Meghalaya ha ka mukotduma WP (C) No. 301 of 2020 heiyatoh wa i pynlait ya ka bhah ka Council.

Chooh chooh ya ka poisa katkam ka bhah (Royalty), ka Executive Committee da kyrpaad ko ya ka sorkar wow pynbiang ya i kheiñsap (Statement of Receipt) wa da pynlang da ka chnat wa yatoh wa ini i kaam khamtam ka dan na u mooyong wa moochuni chirup wa ki Challan khnang wow pynsuk ya ka Council wow pynbiang ya i sap i tap man-u-snem.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Heiyatoh wa ka dan (Cess) wa da khrong wa da yoh na ki thaw tih mar phohkhyndaw (Mining Area) daw pynemkaam yow pynbiang ya iwa emkaam ki paidbah kam ki luti lai kjat, ka umdih, ki dooid wa kiwi kiwi tangwa kani ka dan ym em u e ka sorkar ya ka Council iwa da ktah ya ka Council wow wanrah ya ki kaam pynroi.

Heijooh i por da kdaw leh ya i kreh ya ka Iawmusiang Market Complex iwa da sahteiñ da boon snem heiwa hadooh katni dang yoh du ya ka bhah wa nyngkong namo ka 1st Installment na ka Ministry of DoNER kawa T. 6.33 klur wei ya ini i kreh da chimkti noh da ka PWD (Building) wei neidaw wa ym pynlait ya ka bhah wa ar kamtæ i kreh leh da snageh i da palat 10 snem hadooh katni wei ka sorkar toh u leh noh ko neiliang yong ka yow pynkreh noh.

Kamtæ da kyntu ya u Sniawbhalang Dhar wow chimkhia noh ya ini i kaam khnang wow myntoi ka Council wa ki paidbah leh kamjooh.