U CEM ka JHADC, u Thombor Shiwat uwa man leh kam u dkhot ka Regional Committee pynbait pood ka West Jaiñtia Hills District neibynta ka Block-I wa Psiar-Khanduli hawa kylli lada daw pdiang deiwa e kylliang wei chim khylliang yei thaw namo ka Give & Take Policy, da ong u wa nyngkong hapoh ka Committee da pynbait wa daw lai hiar cha kini ki chnong yow kylli na kiwa chong chnong cheiwon kwah ki wow em lada cha ka Meghalaya namo cha ka Assam wei ym ye u taan hi-eh deiwa leh dei bor lada ym kwah kiwa chong chnong.
Da ong u leh wa daw hap pait kiwon kiwa sah ha kini ki chnong lada ki Pnar, ki Bhoi, ki Khasi kiwa yahaap waka riti dustur, kiwa yahaap wei long i man waka jylla yong i wei daw hap pyrkhat yeini hawa leh yeini waroh.
Heijooh i por da ong u wa ym em mut wow pdiang hi-eh katwa kwah ki bru neibhah hap leh wow pait ya u pood kamjooh ka Map wa ki thaw wa sah ki.
Heiyatoh won waka Block-I da ong wa em ki chnong wa em i kajia pood tangwa ki wym haap hapoh ka Block-I kam ka Khanduli, ka Psiar, ki Mukoiram, ka Tahpat wa kiwi de wei kini ymtoh wow pynmih pyrtuid ki kam ki chnong wa em i yaknieh thaw neibhah kini ki chnong toh kiwa pait da ka Council kawa e sanat ya ki waheh chnong, i thung ya kiwa sikai skur wa kiwon kiwon ki kaam pynroi toh iwa da e da ka JHADC.
Kamtæ da ong u wa kini ki chnong toh kiwa da haap chwa hapoh Meghalaya wei ymtip yei daw wa da wan toor ki Assam chadooh kini ki chnong.
Hawa kylli won yei kynaad wa da mih ini wa dep hapyrdi ki Pnar wa ki Karbi, da ong u wa da dep wow lai pynsñiawthooh ya kiwa yahkhmat chnong yow ya em i ya sñiawthooh kylliang wei nadooh nachwa da em i ya im suk tangwa ini wa dep won da em kiwa pynyieñ da ki Tax Gate neitæ mih sa ki khubor wa da khang ki Khanduli wow psiah ki Karbi cha Meghalaya wei ki Karbi leh da leh ki kamjooh.
Hajrong ini da ong u wa ka KHADC deilang waka KAAC daw chong pynbait ki yeini wei hapoh ka Committee leh daw ya bait ki wow leh yeini.
