U MDC ka NPP na Sohryngkham Constituency, u Pyniaid Sing Syiem ynne da chah jied u kam u CEM wa thymme ka Khasi Hills Autonomous District Council (KHADC) khlem da em kiwa yieñ yaleh pyrchah.
Ya kani ka Election jied CEM da pynman ynne tangwa neidaw wym em de da kiwi kiwa thap pyrtuid kam u kyrtong, neiliang u Chairman ka Council, u Lamphrang Blah da pynbna syndn u ya u Pyniaid kam u CEM wa thymme ka KHADC.
Hadien ini, ya u Pyniaid Sing Syiem da wan wow pynkup burom wei wow khublei kti da ki MDC ka Council.
Kam wow pynkynmoo wa ynnin ka sngi, ka EC wa yahkhmat da ka United Democratic Party (UDP) hapoh u Titosstarwell Chyne da haap noh ko hadien wa wanrah ya ka No Confidence Motion da u MDC ka NPP, u Bajop Pyngrope heiwa da yoh leh yei kyrchaan na ki 6 ngut ki MDC ka Congress.
Kamtæ hapoh kani ka EC wa thymme wa tip kam ka Khasi Hills Democratic Front, da pynbna ya u PN Syiem kam u Deputy CEM uwa man leh u MDC ka Mawkhar katwa ya ka chuki u Deputy Chairman u lai ko cha u MDC ka Mawhati, u Charles Marngar kiwa man kam ki MDC ka Congress.
U CEM da pyntip u leh wa u Charles Marngar daw chimkti noh u kam u Deputy Chairman hadien wa u MDC ka Mawsynram, u Alvin Sawkmie wan e u ya ka chithi wa da ieh ya ka chuki.
Da ini, ha waroh ki District Council ka jylla kattu da yahkhmat ya ka Executive Committee da ka NPP wei ha ka KHADC wa JHADC daw pynman leh ya ka Election mynried u snem.
