Ka seiñ Meghalaya Indigenous Minority Tribes’ Forum (MIMTF) da dawa ko 15% i bhah kreh hapoh ka Job Reservation Policy neibynta ki jaitbru Rabha, Boro, Hajong, Koch wa ki Mann kiwa em hapoh ka jylla.
Ha ka dorkhat wa da e cha u Montri Rangbah ka jylla, u Conrad K Sangma da ong wa hadien wa pynbait thymme ya ka Reservation Policy wow booh bhah 15% ya kini ki jaitbru ri-loom wa khian paaid ka Meghalaya, kitæ ki Hajong, ki Koch, ki Rabha, ki Boro-Kachar wa ki Mann yow ye ki wow ya ryngkat wa ki Khasi, Jaiñtia wa ki Garo.
Da ong ki wa deiwa leh kamni daw ye wow pyndap yeiwa da dooh bhah ki kattu la 51 snem wow yoh kreh sorkar deilang wa kiwi de i bhah kam ha ka puræ puthi, ka kamai kajih wa kiwi de.
Da ong ki leh wa ki toh kiwa chong chnong wa pura wa paka ka Meghalaya kamwa man ki Garo, ki Khasi wa ki Jaiñtia deiwa kdaw wa ki Karbi, ki Marngar (Dimasa) kiwa sah ha Ri-Bhoi District leh man ki ki jaitbru ri-loom wa pura ka Meghalaya.
Chooh chooh da ong wa ha ka Job Reservation Policy wa katni, 40% toh ya ki Khasi wa Jaiñtia, 40% ya ki Garo, 15% ya ki General wa 5% ya kiwi ki jaitbru ri-loom (ST wa SC) tangwa kani ka 5% kamwa man da yoh du 2% neibhah wa da hap yabhah ka wa ki Scheduled Caste deilang wa kiwi ki jaitbru ri-loom kam ki Naga, Mizo kiwa na baar ka jylla.
Hapoh kani ka MIMTF da emlang ka Meghalaya Hajong Welfare Association, Meghalaya Rabha Jatio Sewa Sangha (MRJSS), Meghalaya Koch Association, Meghalaya Boro Sahitya Sabha waka All Mann Tai Speaking Welfare Association.
