Ka Khasi Hills Autonomous District Council (KHADC) ynnin kam chibynta ka dorbar lyiur da chim ko da ka rai namo ka Resolution wow pyrchah yei thmu ka sorkar pyrdi wow pynkrehkaam ya ka Uniform Civil Code (UCC) wot hapoh ki thaw wa em hapoh i pait ka Council.
Ya kani ka Resolution da wanrah da u CEM ka KHADC, u Pyniaid Sing Syiem deiwa ong wa ini i thmu ka sorkar pyrdi daw pynwiar ko ya ki dustur riti, i rukom hiar pateiñ, i rukom chongkha chongman wa i yoh laitlooid wow jied ya ka niam.
Kani ka Resolution da yoh ko leh yei kyrchaan na ka liang pyrchah heiwa u CEM warim, u Titosstarwell Chyne da ong u wa kani ka UCC daw ktah ko hadooh ya ki seiñ niam hadooh i pynbia, i hiar pateiñ i hot i pot iwa mut da pynyang yei maa ya ka jylla lada pynkrehkaam ka.
Neiliang u CEM leh da ong u wa da em ki Article hapoh ka Constitution ka ri India wa emkaam wow yada yei rukom im ki jaitbru ri-loom nadooh ka dustur riti, i mantre ki yei thaw i bhaw, i rukom kheiñ jait, i rukom e jait iwa da bood nadooh warim kamjooh ya kini da yada leh hapoh ka 6th Schedule.
Kamtæ da ong u wa kam ki MDC kiwa da pynkitkhlieh wow yada ya ini waroh, toh u pynyoo yei pyrchah wa joor.
Hajrong ini, waroh ki dkhot ka Council da mynjur ki wow kyrchaan ya ka Resolution yow pyrchah yei pynkrehkaam ya ka UCC.
