U Montri Rangbah ka jylla, u Conrad K Sangma da pyntip u wa da dep wow phah ya ki Committee wa da chna wow chong bichaar ya ka State Reservation Policy wow bichaar lang yei dawa yong kiwi ki jaitbru ri-loom wa khian paaid ka jylla wow e 15% cha ki manda pynbait thymme ya ka Job Reservation Policy.
Ini i phah man ko ya ka Committee ki seiñ saiñ pyrthai wa ka Expert Committee wow chong bichaar biang ya ka State Reservation Policy ka jylla katkam i dawa yong ki liang waphær waphær deilang wa ki seiñ saiñ pyrthai.
Hawa pyntip yeini, u Conrad da ong u wa ki jaitbru ri-loom wa khian paaid waphær waphær ka jylla da lai ki wow e dorkhat ha oo ha ka tayaaw wa da dep yow dawa e bynta lang ya ki jaitbru ri-loom wa khian paaid kiwa em hapoh ka jylla yei bhah thung kreh sorkar.
Kam wow pynkynmoo wa ha ka 22 tarik uni u bnai, ka Meghalaya Indigenous Minority Tribes’ Forum (MIMTF) da dawa ko hadooh 15% i bhah thung kreh neibynta ki jaitbru Rabha, Boro, Hajong, Koch wa ki Mann.
Ya kani ka dorkhat da soi da ka Meghalaya Hajong Welfare Association, Meghalaya Rabha Jatio Sewa Sangha (MRJSS), Meghalaya Koch Association, Meghalaya Boro Sahitya Sabha waka All Mann Tai Speaking Welfare Association.
Puræ leh: Dawa ki jaitbru ri-loom wa khian paaid 15% i bhah kreh hapoh ka Reservation Policy
