Ki khynnah ki wow pyndep yei puræ yong ki namo ka Batch 2020-23 chirup wa ka Political Science Students’ Committee wa ka Department of Political Science, Kiang Nangbah Government College, Jowai da pynman ki yei thung dieñ ha ka 27 tarik uni u bnai hajrong ka phang “Solutions to Plastic Pollution” kawa man leh ka phang yong ka World Environment Day uni u snem.
U Dr J.P. Sharma, IQAC Coordinator, KNGC kam u symbood kongsan da kyntu u ya ki khynnah wow pynduna yei pynemkaam Plastic khamtam kiwa pynemkaam du chisien donhi wei wow thooh laad ki wow pyndooh yei jhep Plastic. Chooh chooh da kyntu u ya ki khynnah wow im ha i rukom wow pynduna ya i chah ktah ka rymaw.
Ka Principal ka College, ka Dr. (Mrs) E.M. Blah kam ka kongsan da e khublei ko ya kiwa pynman ya kani ka yalang kam chibynta yong ka World Environment Day kawa man ha ka 5 tarik uni u bnai deiwa pynchlur ya ki wow pynman ya kam kini ki yalang ha ka College. Da kdaw ko yei myntoi wa yoh nei thung dieñ, i pynkhooid ya ki thaw puræ iwa ye wow yada ya ka rymaw. Heijooh i por da kdaw ko yei myntoi wa yoh na ki dieñ nadooh ka la’ær, wow pynneh ya ka rym-aw, wow pynduna yei oor khyndaw, wow yada ya ki thaw dem thaw rieh ki mrad wa kiwi kiwi. Da kyntu ko ya waroh wow thung ya ki dieñ kamjooh wow sumaar wow pynheh pynsan ya ki.
Heijooh i por da e kti leh ya ki dur na ka Educational Study Tour Group Photo waka Coffee Table Book cha ka Principal kiwa e sñiawbha da ka Meghalaya Legislative Assembly.
Ha kani ka sngi ka kongsan wa u symbood kongsan kamjooh kiwa sikai ka College, ki khynnah puræ wa kiwi kiwi da thung ki 50 tylli ki tre dieñ wa da yoh na ka Forest Department, West Jaiñtia Hills District, Jowai Division.
Ya ka yalang ha kani ka sngi da pynlai da ka D. Lamare kawa man ka Asst. Professor, ki kyntien pdiang burom na ka Nideilang Lamare katwa ya ki kyntien khublei da yoh na u Trebok Talang.
