U President ka National People’s Party (NPP) uwa man leh heijooh i por u Montri Rangbah ka jylla, u Conrad K Sangma da ong u wow pynkrehkaam ya ka Uniform Civil Code ha ri India ym yahaap i neibhah ka ri India toh kawa boon ki jaitbru kiwa jar jiar ki riti ki dustur.
Da ong u wa i boon ki jaitbru toh i bor yong ka ri India, deiwa e nongmuna yei man kyrpang yong ki jaitbru hapoh ka jylla Meghalaya kiwa chim dei kur ka bei yeiwa ym ye wow pynkylla.
Da ong chooh chooh u wa ym du ka jylla Meghalaya, tangwa waroh ki jylla kiwa em cha ka thaaiñ yong i kiwa em ki riti dustur kiwa kyrpang ya kiwa ka NPP ym yahaap ko iyi iyi wow pynkylla.
Heijooh i por u khliehdooh ka NPP da ong u wa ya katni daw pait kawa kammon katæ ka aiñ wa da tyrwa (Bill) u wanrah hapoh Parliament, wei pynrap biang u wa ka UCC man pyrchah ko yei long i man ki paidbah ka ri India.
Kam wow kdaw heini wa ka sorkar National Democratic Alliance (NDA) wa yahkhmat da ka BJP da pynkhreh ko chaait chaait yow ye u pynkrehkaam noh ya ka Uniform Civil Code ha waroh kawi ka ri India, deiwa wanrah da ka jooh ka aiñ hawa yatoh wa i chongkha chongman, i pynlait kurim, i yoh hiar pateiñ ha ka spah ka phaw wa kamjooh hawa ri ya ki khon kiwi.
Ya kani ka Bill da wanrah leh ha u snem wa da dep hapoh ka dorbar ha Rajya Sabha kam ka Private Member’s Bill, wei katkam ka khubor wa da yoh da ong wa neiliang ka BJP daw wanrah biang ya kani ka Bill ha ka Dorbar Lyiur yong ka Parliament kawa daw man.
