Ka lympung yaleh Badminton wa tip kam kam 7th East Khasi Hills Badminton Championship wa pynman da ka East Khasi Hills District Badminton Association kawa da sdang nadooh ka 29 tarik u Naiynru da poi ko cha wakut ynnin ka 1 tarik.
Waroh da em 120 ngut kiwa yalehke kiwa da wan wow chimbynta nadooh ki khynnah wa ki waheh kiwa da yakhun ha jar jiar ki kyrdan.
Kiwa jop man ki kamni ha wah:
Under 13 Girls Single– Ka Asem Chanu Shivani
Under 13 Boys Single– U Haegan Diengdoh
Under 15 Girls Single– Ka Netania T Tariang
Under 15 Boys Single– U Gavin Kharbuki
Men’s Doubles– U P. Joshi wa u Subadonbor Pyngrope
Men’s Single– U Mohit Joshi
Women’s Single– Ka Elsarica Umdor
Under 19 Girls Single– Ka Angenora Monin
Under 19 Boys Doubles– U Pratham Majumdar wa u Raynell Kharbuki
Under 17 Girls Single– Ka Sneha Chetri
Under 19 Boys Single– U Mohit Joshi
U kongsan ha kani ka sngi pynhaap pyrda toh u T. Passah, Project Director DRDA, East Khasi Hills District.
Neiliang ka East Khasi Hills District Badminton Association da ong ko wa kiwa em sap wow yaleh Badminton em ki boon bha kiwa ye leh wow poi cha ka kyrdan yong kiwa hapoh ka ri lada ye wow saindur ki nadooh wa dang khian ki.
Tangwa neidaw wym biang ki thaw yalehke kamjooh i kyrchaan poisa da chem chitom bha wow ye u leh yeini wot hawa pynman ya kani ka lympung ha uni u snem wym yoh thaw pynman neidaw ka U Tirot Sing Indoor Stadium ha Lachumiere da dep tympra wei ka JN Sports Complex ha Polo leh toh kawa dang em hei pynchna.
Ka seiñ da e khublei ko yaka Isawanda Laloo, Director ka Sports and Youth Affairs kawa da yarap ya ka Association wow ye ko u pynman ya kani ka 2023 Championship deiwa jop.
Hei khaddooh, ka seiñ da kyntu ko ya ka sorkar wow e thaw ko yow chna ya ka thaw yalehke wa biang wei kamjooh leh ya ki Company wow wan ki chakhmat yow kyrchaan poisa yow pynman ya ki Tournament yow yoh laad kiwa yalehke nadooh wa dang khian wow pynpliah yei sap yong ki.
