Ynne ka sngi ka Montri wa pait yaka chnat yong i rep i riang wa i chait i khiah, ka Dr. M. Ampareen Lyngdoh deilang wa ki MLA ka Ri-loom Jaiñtia wa kynthup ya u Lahkmen Rymbui, u Nujorki Sungoh, u Wailadmiki Shylla, ka Santa Mary Shylla najrong ki sahep sorkar ka jylla da hiar ki cha Jowai wow yachem wei wow booddien wa ki bor wa toh u pait yaka chnat i rep i riang wa i chait i khiah ha waroh artylli ki District ka Ri-loom Jaiñtia kitæ ka East waka West Jaiñtia Hills District.
Ya kani ka yalang da pynman ha Conference Hall ka yung krehkaam yong u Divisional Soil and Water Conservation ha Jowai deiwa emlang leh nadooh u DC ka East wa West Jaiñtia Hills deilang wa ki sahep sorkar yong waroh ar District, wei nyngkong da em chwa ka yachem waka chnat i chait i khiah heiwa ka Dr. M. Ampareen da yaklam haroh ko waki ASHA heiyatoh u pynbait smat noh i su ya ka nong wa dang sahteiñ yong ki.
Haka noh chariñ sngi won da yachem ko wa ki sahep ka chnat i rep ka riang.
Tangwa neidaw wa ka Montri wym em sñiaw chait ko wei nang sñiaw tlot chooh chooh ko katwa dang chong yalang, kamtæ manda wai ka yalang da liwan bait ko cha Shillong, wei heithaw yong ka da hap u klam noh daka Santa Mary Shylla, MLA ka Sutnga Saipung Constituency wa kiwa thoh khubor.
Neiliang ka Santa Mary khana ko wa ya kani yalang da khut daka Montri neidaw wa kwah ko u tip yei rukom krehkaam kini ki chnat kamjooh i eh i khoo wa maad ki khnang yow ye u pynbha chooh chooh yei chakri paidbah.
Da ong ko leh wa ki kam ki MLA wa emlang ha kani ka yalang da pynsñiaw ki ya jar jiar i eh i khoo kamjooh i emkam ha jar ka District la heiyatoh i chait i khiah næ i rep i riang.
Kamtæ yooluti ko wa lyngba kam kani ka yachem yumut wa i wan ka Montri daw em i kylla neibhah waka sorkar hi leh da pyrchang ko ya ki buit ki bor wa boon.
