Ka KSU East wa West Jañtia Hills District Unit hapoh i yahkhmat u President yong ka, u L. Synrem na West Jaiñtia Hills wa u Secretary ka East Jaiñtia Hills, u KS Suchiang ynne da lai yachem ki ya u Dy. CEM ka JHADC, u Lasky Rymbai wow pynsñiaw yei pyrchah ya i thmu ka sorkar wow wanrah ya ka luti rel hapoh Ri-loom Jaiñtia wei wym toh u e NOC yaka Northeast Frontier Railway.
Hadien ini i yachem, hawa yaklam wa u KS Suchiang, da ong u wa i thmu ka sorkar wow wanrah ya ka luti rel toh iwa da pyrchah ka seiñ.
Da ong u wa ka seiñ nadooh u 1988 da pyrchah ko yei thmu wow wanrah ya ka luti rel hapoh ka jylla wei i pyrchah u pteiñ bait i.
Chooh chooh da ong u wa hawa da pyndam ya i thmu wow wanrah luti rel na thaaiñ Ri-Bhoi neiyi i daw won wa ka sorkar katni kwah ko wow wanrah ya kani ka luti ha Ri-loom Jaiñtia.
Heijooh i por da ong u wa toh u pynkrehkaam chwa ya ka ILP ha ka jylla neitæ won u yaklam ya ka luti rel.
Da ong u wa neiliang u Dy. CEM leh da kular u wow yaklam ya ini i bynta ha ka Executive Committee, neibhah lada jia wa poi ka luti rel iyi wow jia won ya ka jaitbru khian paaid yong i lada wan katæ ka luti rel.
![](https://i0.wp.com/wyrta.com/wp-content/uploads/2023/07/pyrfd1.jpg?resize=962%2C491&ssl=1)