Ka yakhih dawa kyrriah yaka Entry Tax Gate ka Karbi Anglong Autonomous Council (KAAC) wa em ha chnong Khanduli da pteiñ biang i ynne ka sngi ha Jowai deiwa chimbynta ki paidbah ka chnong Khanduli kamjooh leh ka seiñ Jaiñtia Students’ Movement (JSM) kiwa da li tia ha pchem ka yungkrehkam ka Jaiñtia Hills Autonomous District Council wa ha pchem ka yung krehkaam u Deputy Commissioner ka West Jaiñtia Hills District.
Ya kani ka yakhih da sdang na Wah Gate, Jowai dei lai paidbah wei ki dkhot ka JSM kamjooh ki paidbah Khanduli da rah lang yaki Placard deiwa kbai pynrem joor ki yaka sorkar hajrong i wym ye ko u leh iyi iyi ya kani ka Tax Gate wada wan booh kattu la le bnai, da beiñ joor leh yaki MDC ka JHADC kiwa leh khlot bait hadooh katni wot hawa ka toh kawa mantre yaka khyndaw u chyiap.
Katwa dang lai luti ki cha JHADC da li pynkhih haroh ki yaka Gate ka yung krehkaam u DC deilang i kbai pynrem ya u DC kamjooh ki Magistrate, wei manda poi won ki ha pchem JHADC da em ka yalang, wei kiwa da e yei klam ha kani ka thaw kynthup ya u waheh chnong ka Khanduli, u Yooshida Nongspung, u N. Challam, Chairman chnong Khanduli, u Kerbhami Dkhar, u Boumi Myrphet na ka chnong Lapangap, ka Darapbiang Mulieh na chnong Khanduli, u Working President ka JSM West Jaiñtia, u J. Kharmuti, u Pyrkhat Myrphet wa kiwi da pynrem joor ki yaki MDC ka JHADC deiwa ong wa toh kiwa yahkhmat wa thlah weiwa thiah sngi neibhah najrong wym chimkhia ki yei yap i im ka jaitbru boon leh ki kaam hapoh ka yung krehkaam yong ki wym jooh lai bait lai ryntih ki iwa da wanrah yei saja yow paidbah.
Ha kani ka thaw da yoh leh u yaklam kyrpang wa u waheh chnong ka Khanduli, u Yoshida Nongspung uwa da khana wa ha kini ki 3 bnai nadooh wa booh Tax Gate, ki paidbah ka chnong Khanduli da maad ki chiboon i eh wei da dooh li rep li riang ki cha ki thaw yong ki neibhah wa ki jaitbru Karbi da khanglaad ki.
“Heiyatoh i wan yong ki kam ka chnong ha Jowai ong u toh hajrong ka yurim wow dawa kyrriah yaka Tax Gate wei wow pynrem joor yaki MDC ka JHADC ki wym jooh leh iyi iyi næ wan yoohkjat chisien wot leh hapyrdi i eh i khoo waka Khanduli maad ko katwa ki MDC Karbi won poi Khanduli ki man-i-por”.
“Tip i wa ya kani ka Tax Gate da booh daka Karbi Anglong Autonomous Council kamtæ ka Jaiñtia Hills Autonomous District Council leh toh u chimkhia bha ko yeini u yaklam para District Council tangwa man-i-por yoo i wa da chimkhia bait da ki bor District.”
“Hawa em iwon iwon i yaklam neiliang ki Karbi da wan bait da ki heh ka Autonomous Council yong ki tangwa na Jaiñtia won ym jooh yoo yaki bru ka District Council wow wan ki chapoh ka chnong ka thaw.”
“Kam ka chnong yoh yarap bait i du neiliang u DC wa SP kiwa da pynbiang yaki bor e yada wei kiwa da wan hiar bait da ki hi cha ka thaaiñ yong i wot wow yaklam wa ki bor District ka Karbi, tangwa i pyrchang yong ki ym poi ko cheiwon cheiwon neibhah wa neiliang ki MDC wym em chimkhia ki yaka bynta yong ki,” ong u waheh chnong Khanduli.
Da khana haroh u wa ka Assam katni da nang pynbiang chooh chooh ko yaki bor pulit kynthai wa chynrang kiwa da khynjoh hadooh 500 ngut. Kamtæ pyntip u lada ka sorkar ym leh ko iyi iyi yow kyrriah, ka chnong wym yohsa ko u toor chei yap dei wow yakhun ki waki bor ka Assam.
Hadien ka yalang na JHADC da lai psiah won ki ha pchem u Deputy Commissioner wei heini won u Ribok Biam, President JSM Western Region ong u lada ka sorkar wym ye ko u leh yei kaam hajrong i tia pood ka Assam ha Khanduli wym slem de kiwa boon kiwi won ki chnong leh daw chah kyntoor pood ki.
Wei lada ki dkhot ka seiñ kamjooh ki paidbah Khanduli hap ki wow yaleh thma da ki neibynta u kyrriah yaka Tax Gate heitæ i por lada jia iyi iyi, ka sorkar toh wow kitkhlieh.
Ha kani ka jooh ka sngi u DC da khut yaklam u yaki dkhot ka JSM kamjooh kiwa yahkhmat chnong Khanduli wei da pan por u chi tayaaw yow leh iyi iyi heiyatoh wa ini.
Kamtæ da chim ya ka rai wa lada jia wym mankaam, ka yakhih daw pteiñ biang ko, ong ki dkhot ka JSM wa kiwa yahkhmat chnong Khanduli.
