Ka 3rd Division wa tip leh kam ka 3rd U Adelbert Laloo Memorial Trophy wa pynman da ka West Jaiñtia District Sports Association (WJDSA) da pteiñ biang ya ka ynne ka sngi da ar tylli ki yalehke.
Ha ka yalehke wa nyngkong, ka Mookaswan Dongwah da jop ko yaka Pasyih Cultural da 1-0 da ka kool wa thap u Bor Shylla haka minit wa 66.
Ha ka yalehke wa ar, ka Umlangshor da jop ko yaka Loompyrdi Iongpiah da 5-1.
Ya ka Umlangshor da thap kool da u Mihthymme Sumer haka minit wa 33, u Ryngkat Sumer haka mint wa 48, u Nangtei Shylla haka minit wa 57, u Rioo Lyngdoh haka minit wa 59 wa u Niawkor Sari haka minit wa 64 katwa yaka Loompyrdi Iongpiah da thap da u Salankiru Passah haka minit wa 54.
Ki yalehke mynstep toh hapyrdi ka Luti Tuber Ialong waka Tpep-Pale heipor 10:30 i step wei daw pynbood da ka Moodymmai waka Lumsliarsliar heipor 12:00 waje pyrdi sngi.
Discussion about this post