Ka Directorate of Food Processing ynne da pynman ko ya ka tamasa wa chi sngi kawa da e pyrtuid ka ‘Jack Start 2023’ ha State Convention Centre, Shillong heiwa ka Dr. M. Ampareen Lyngdoh, Montri ka chnat Agriculture & Farmers’ Welfare da embynta ko kam ka kongsan.
Hawa e yei klam, ka Dr. M. Ampareen Lyngdoh da ong ko wa ka Meghalaya em ko palat 10 lak tylli ki dieñ Sachram ha kylleiñ ka jylla wei kiwa da heh da san ha kpær ki bru khlem da emkaam wow sumaar u syndong.
Kamtæ da ong ko wa emkaam wow pynyaar ya ka Jackfruit Mission kawa da em katni ha u snem wa khaddooh wa da pynkrehkaam yow ye u pait hadooh katwon yoh myntoi ki warep na kani. Da ong ko leh wa ki bru wa seiñ khih em laad ki wow yoh nong deiwa chna ya ki mar baam na u Sachram.
Da kyntu ko leh ya ki sahep ka chnat Agriculture wa Horticulture wow pteiñ ki wow ya krehlang wa kiwa pynmih mar baam wei wow e yei kyrchaan yow man ki mar wa pynmih ki kiwa bha wa miat katkam ki kynrdan wa da booh yow ye u dai cha ki yaaw ki haat wa em cha baar ri.
Neiliang u K.N. Kumar, Chairman, Meghalaya Farmers’ (Empowerment) Commission, da klam u hajrong i chna mar baam na u Sachram katwa u M.L Suiam, Officer on Special Duty, Directorate of Food Processing da khana u chaphang ka Mission Jackfruit.
Neiliang ka Montri da lai pait ko leh ya kiwa boon ki dukan kiwa da booh kiwa dai ya ki mar baam wa da pynmih na u Sachram.
Kiwi de kiwa da emlang ha kani ka sngi toh ka Isawanda Laloo, Secretary Department of Agriculture & Farmers Welfare, ki sahep ka chnat Agriculture wa Horticulture, kiwa seiñ khih, ki warep wa kiwi de.
Discussion about this post