Ki yakhun Final ka State Level Subroto Mukherjee Cup 2023 kawa man ka lympung yalehbol hapyrdi ki skur ka jylla dapoi ko cha wakut ynne ka sngi ha madan ka Sports Authority of India (SAI), STC, NEHU Mawlai.
Ki yalehke da sdang da ka U-17 ki kynthai, wei da pynbood da ki U-14 ki chynrang wei da pynkut da ka U-17 ki chynrang.
Ha ka U-17 Girls da jop da ka Saiden Secondary School (Ri-Bhoi), ka U-17 Boys da jop da ka Assam Rifle Public School (East Khasi Hills) wei ha ka U-14 Boys da jop ka H.K. Singh Secondary School (West Jaintia Hills).
Da wan wow sakhi ya kini ki yalehke Final da u Montri ka chnat Sports & Youth Affairs, u Shakliar Warjri waka Isawanda Laloo, IAS, Director ka chnat Sports and Youth Affairs
Kini kiwa jop daw lai mihkhmat ki ya ka jylla haka 62nd National Subroto Cup kawa daw pynman ha New Delhi wa Bengaluru nadooh u Naikhynde hadooh u Naichiphaw 2023.
Ha ka Under-14 Boys, ka H.K. Singh Secondary School, WJH da jop ko yaka K.B. Memorial Secondary School, EJH deiwa yachut Tie-Breaker da 4-1 hadien wa ka yalehke da kut ko da 0-0.
Yei naam Best Goalkeeper da yoh u Novem F. Siangshai naka K.B. Memorial Secondary School katwa yei naam Player of the Tournament da yoh u Budmiha O. Mukhim naka H.K. Singh Secondary School.
Ha ka Under-17 Girls, ka Saiden Secondary School, Ri-Bhoi District da jop ko yaka Iewrynghep Secondary School, EKH deiwa yachut Tie-Breaker da 4-2 hadien wa ka yalehke da kut ko da 0-0.
Yei naam Best Goal Keeper da yoh ka Yulity T. Phangrang naka Iewrynghep Secondary School. Yei naam Player of the Tournament da yoh ka Diamon Makhroh naka Saiden Secondary School.
Ha ka Under-17 Boys, ka Assam Rifle Public School, EKH da jop ko yaka Rymbai Presbyterian Higher Secondary School, EJH deiwa yachut Tie-Breaker da 5-4 hadien wa ka yalehke da kut ko da 2-2.
Yei naam Best Goal Keeper da yoh u Oinam Abin Singh naka Assam Rifle Public School. Yei naam Player of the Tournament da yoh u Bankerbha Dkhar naka Rymbai Presbyterian Higher Secondary School.
Discussion about this post