T. 30 lak chi snem u yoh ki Nurse wa bien u lai kreh cha baar ri, ong ka Ampareen

Ki thaw sumaar wa na baar ka ri India wa kynthup na Japan, United Kingdom, UAE, Singapore, Germany wa kiwi kiwi, da pynsñiaw ki wa kwah ki ya ki Nurse na ka jylla Meghalaya wow kreh wei sumaar ya kiwa kjut. Ya ini da pyntip da ka Montri ka chnat i chait i khiah ka Dr. M. Ampareen Lyngdoh.

Ka Montri da ong ko wa ka sorkar daw pynman ko ya ka Overseas Nursing Job Fair ha ka 4 tarik u Naisaphra, neibynta ki Nurse kiwa chong khlem kreh, wei da pyntip ko wa em hadooh kamwa 1000 ngut ki Nurse kiwa chong khlem kreh kiwa da thap pyrtuid wow lai chim bynta ha kani ka Job Fair.

Ka Dr. Ampareen da ong ko wa ka sorkar smat ko wow pynlut T. 50,000 samen neibynta wow pynbiang ya ki Nurse, heiwa daw yasoi leh ya ka soskular da ka sorkar jylla wow pyntikna yei chngaaiñ ki Nurse ka jylla kiwa lai kreh cha baar ka ri India.

Da ong ko wa ki Nurse wa da chah jied wow lai kreh ha ki thaw sumaar kiwa cha baar, ka kamai yong ki hadien wa da khate lut ya kiwi ki pynlut ym duna ya ka T. 30 lak chi snem.