Ym pdiang ka VPP ya ka Public Hearing wa leh sop-sop ka MCL wa em du chi yung chi sem kiwa kyrchaan 

Hadien wa da pynkut ya Public Hearing ka Meghalaya Cement Ltd. ha ka 24 tarik wa da pynman ha Thangskai, East Jaiñtia Hills, neiliang u Damewanhi L Rymbai uwa man leh u Organising Secretary ka VPP, East Jaiñia Hills District da pynsñiaw u yei pyrchah ya i thmu wow pynheh yei bor pynmih khyndaw-bilat wa i Clinker deilang wa kiwi de ki thmu kani ka karkhana.

Da ong u wa ym ye u pdiang  yei rukom pynman ya ka Public Hearing kawa sop-sop kawa da kyrriah hadien wa da tympra ki paidbah yei thaw wa toh u pynman deiwa leh embor u pynman ha Community Hall ka MCL wei manda ong ki wow psiah ym chah ya ki kamjooh ya kiwi de.

Kamtæ da ong wa yeini wa da pynman hapoh kani ka Hall ka MCL ym ye u pdiang neibhah da em du kiwa ha-yung ha-sem u Local Director wa kiwa kyrchaan katwa ki paidbah ka thaaiñ Narpuh wa boon wa pyrchah kiwa da ya mih ryntih ynne ka sngi ym yoh ki wow psiah.

Da ong u leh wa ini i leh man ko i chim kabu ki baar jylla wow yoh laad u thied wei pynyachoh para i neibhah da yoo u wa boon ki khynroo da muaid ki neibhah waroh chi tyaaw da psa ki, da e poisa ya ki yow e ki ya itæ i kyrchaan.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Chooh chooh da ong u wa u Local Director, u Phon Syih da dep u wow e ya ka hukum ya ki khynnah chnong kiwa kyrchaan deiwa ong u kiwon kiwon kiwa pyrchah kiwa mut wow pynkulmar toh u yachoh wa ki wei kini leh toh kiwa da rah wa ki dieñ wa ki tiar ki tar wei ini waroh toh iwa da pynkhreh chwa.

Da ong u leh wa kam ki kyndon wa da pynbna toh u e laad ya waroh wow pynsñiaw nadooh kiwa kyrchaan wa kiwa pyrchah tangwa ki pulit won ym em laad ki ya kiwa pyrchah deiwa dat wei pom wei siat Tear Gas ya ki wei ini ym ye u pdiang deiwa beiñ leh ya ki bor District kamjooh leh ki bor ka aiñ.

Da kyntu u leh ya ka Meghalaya State Pollution Control Board wym toh u pdiang ya kani ka Public Hearing neibhah wa da leh sop-sop wei ym em yoh laad kiwa pyrchah wow e yei pynsñiaw yong ki wei daw lai yah leh ya kiwa chong chnong cha Shillong cha yung krehkaam ka Board yow pynyoo yeini i pyrchah wei da kyrpaad u leh ya ki MLA wow chimkhia ya ini wa jia waroh.

Da pynkut u deiwa ong da biang mut da miat ym boi pynheh ym boi wanrah da kiwi ki karkhana wa thymme neibhah ki paidbah da dep ki wow chah chitom chiboon.