Ha ka 24 tarik uni u bnai, ka Kiang Nangbah Government College Students’ Union (KNGCSU) hapoh i yahkhmat ka Union wa em 12 ngut kiwa ksoh kaam wa u Precioustar Sten kam u President da pynman ki ya ka yalang pynkup burom ya kiwa da pyndep yei puræ puthi namo ka Graduation Ceremony neibynta ka ‘Class of 2023’ heiwa u Ardent Miller Basaiawmoit, MLA da wan u kam u kongsan deiwa emlang leh u Adelbert Nongrum, MLA wa u Brightstarwell Marbaniang, MLA kam ki symbood kongsan deilang wa kiwi kiwa chah khut sñiawbha, kiwa ha-yung ha-sem kiwa da pyndep yei puræ, ki HOD, kiwa sikai wa kiwi de.
U kongsan deilang wa ki symbood kongsan da saam ki leh ya ki Certificate of Appreciation cha ka Union wa ki khusnaam kam ka Merit Award waka All Round Performance Award cha ki 13 ngut kiwa da lehbha hei puræ puthi wei da pynlait leh ya ka Magazine ka College.
Neiliang u Precioustar Sten da e u ya ki kyntien pdiang sñiawbha deiwa khana leh wa ini toh i sien wa nyngkong wa kam ka Union da pynman ya kani ka Graduation Ceremony hanla man ko kawa khian ymtoh kamwa ye kiwi ki College wow pynman da kawa heh, da yooluti u wa ha ki snem wow wan daw man ko kawa rap heh chooh chooh.
Da khana u leh yeiwa duna hapoh ka College nadooh i thung ya ki Assistant Lecturer kiwa da man thylli hadien wa da em kiwa boon kiwa da chongngiah iwa da ktah bha ya ki khynnah yow ye u pyndep ya ka lynnong.
Kamtæ da kyntu ya kini ki 3 MLA kiwa em ha ka liang pyrchah wow lai rah ya ini hakhmat ka sorkar.
Neiliang u S. Laloo (HOD Political Science) da e u yei klam neibynta ka Principal kawa ym yoh wow emlang ha kani ka sngi na ki daw wym ye u kiar.
Neiliang kiwi kiwa klam da e ki ya ki kyntien e mynsien ya ki khynnah wow leh ki katwa ye i bor yong ki wei da kitbok kit rwiang ya ki neibynta ka mynried yong ki.
Ya ka yalang da pynkut da ki kyntien e khublei na u Wansalan Lyngdoh, Secretary ka Sport & Games KNGCSU wei da yoh leh yei ah ya u Cake da u kongsan wei da pynkut da ka ya lehkmen.
Discussion about this post