Sdang ki ar seiñ da ka Committee For Peace yow wanrah i suk hapyrdi ki Pnar wa Karbi

Hajrong ka thong wow wanrah yei chong suk chong saaiñ hapyrdi ki jaitbru Karbi wa jaitbru Pnar, ynnin ka 30 tarik neiliang ka Jaintia Students’ Movement (JSM) waka Karbi Students’ Association (KSA) da pynman ki yei yachem lang ha Diphu, Assam.

Neiliang ka JSM da yahkhmat da u President ka JSM Central Body u Lenningstar Rymbai, naka KSA da yahkhmat da u President yong ka u Mirjeng Kro ha chirup i emlang ki bru waheh naki Karbi.

Ha kani ka yalang da chna yaka Committee wada e pyrtuid “Committee For Peace” ka wow man bait thij neibynta u yaklam hajrong kammon u wanrah yei chong suk chong saaiñ hapyrdi ki ar jaitbru khnang wa i lai i wan, i rep i riang wei khayi pateiñ u man biang kam nachwa, neibhah wa i ya pynyoo bor mar kylliang ym wanrah ko yei suk i saaiñ.