Ki dkhot ka Hynniewtrep National Youth Movement (HNYM) ynne ka sngi da mih ki da ki spah ngut wow lai paidbah nadooh Barik nakhmat u mot yong u Kiang Nangbah chadooh Motphran wei ha kani ka lai paidbah da sonteri wei da bood lang leh da ki pulit wa ki bor pynlai District ka East Khasi Hills yow yada na iwon iwon i jia.
Neidaw wa da pynkrehkaam ka Deputy Commissioner ya ka Section 144 CrPC ha ka thaaiñ IGP wa Secretariat, ki dkhot ka HNYM ym em yoh laad ki wow lai lyngba katai ka thaaiñ, tangwa da hap ki wow lai bait nakhmat ka Civil Hospital cha Lum Survey wei mih cha Them Bijoy yow ku won cha Motphran.
Hachwa ini, neiliang ka seiñ da pynman ko ya ka yalang hakhmat u mot u Kiang Nangbah heiwa da yoh yei klam na uwa yakhmat ka seiñ wa kynthup ya u President, u Louis Dohtdong.
Ini i yakhih yong ka HNYM toh hajrong i wym bna ka sorkar yei dawa ka seiñ wow wai ki laad yoh kaam ya ki khynroo khyllood heiwa ka seiñ da dep ko wow yaklam markhat leh wa u Montri Rangbah, u Conrad K Sangma ha u Naiynñiaw yong u snem wa da dep, tangwa neiliang u Montri Rangbah hadooh palat chi snem ym pu em leh u iyi iyi ya ini i dawa.
Discussion about this post