Ka mukotduma PIL wa da chong bichaar da ka Meghalaya High Court heiyatoh wa ki Weighbridge hawa bichaar pynkut, neiliang ka chnat Transport da pyntip ko wa katni em 28 tylli kini ki Weighbridge wa krehkaam heiwa 24 tylli toh kiwa pynkrehkaam da ka chnat Transport katwa ki 4 tylli won toh kiwa da booh da ka chnat Mining & Geology wei da pyntip leh wa da em iwa da leh da ka sorkar wow pynchitom ya ki kari wa kit palatpood wa kynthup ya ki kari wa kit ya ki mar pohkhyndaw.
Ka sorkar da pyntip ko leh wa da phah thied 6 tylli ki Weigh-Pads yow thawkhia ya ki kari heiwa 2 tylli toh kiwa da poi heiwa kawi toh kawa da pyndait ha Dalu, South Garo Hills wei kawi won da pyndait ha Umtyrnga, Ri-Bhoi.
Ka yung bichaar da yooluti ko wa kini kiwi ki 4 tylli daw pyndait ki ha kini ki 6 tayaaw wa daw wan. Tangwa da ong wa du 6 tylli ki Weighbridge na ki 28 tylli ki Weighbridge wow em Weigh-Pads toh i wym pu biang wei ha kini ki thaw wa booh Weighbridge wei kiwa da pyndait Weigh-Pads toh u pyndait lang wa ki CCTV yow lait wow em wow pynkylla yei khia ka kari wa da dep thaw.
Da phah leh ym du ha ki thaw wa thaw khia kamjooh ki thaw kit ya ki mar pohkhyndaw leh hap wow pait bniah kammon da leh yeini.
Ka High Court da pynsñiaw ko leh yei yoh mynsien wow tip wa ka sorkar da khut ko ya ka Indian Institute of Management, Shillong wow thooh laad kammon wow pyntikna wow lait na ini i kit palatpood ki kari.
Kamtæ da pynkut noh ya kani ka mukotduma wei lada jia wa dang em i leh pyrchah neini chakhmat, uwa yaleh PIL ye u wow yaleh da kawa thymme.
Discussion about this post