I rukom leh ka BJP toh yow pynkylla ya ka synchaar paidbah cha ka synchaar niam: HNLC

Ka Hynniewtrep National Liberation Council (HNLC) da ong ko wa i kwah ka Bharatiya Janata Party (BJP) wow pynman da ka ‘One Nation, One Election’ toh i pyrchang wow lai chakhmat wa i thong wow wanrah ya ka Hindutva yow thap waroh hapoh kawi ka rukom man ka Hinduism.

U General Secretary/Publicity Secretary ka HNLC, u Sainkupar Nongtraw da ong u wa ini toh wow pynwiar yei hok kiwi kiwa phær wa kiwa khian paaid hanla da kam wa ka India toh ka ri wym leh chiliang hajrong ka niam wei da seiñ ya ka dei synchaar paidbah.

Da ong u wa ini i thmu da yoo ko wa em hi i napoh napoh wow pynkylla yei synchaar paidbah cha ka synchaar hei pyrtuid ka niam.

Yow lait neini da ong u wa emkaam wow tipmit ya ka India kam ki jylla wa yatylli kamwa leh ha ka United States kiwa da yatylli wow man ka kawi ka ri wei ki yakhih wa da pynman da kiwa boon toh wa sñiawkhia ki yei chah pynkylla dur ka synchaar khadar hapoh ka ri.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Chooh chooh da ong u wa ka One Nation, One Election toh wow ksoh yei bor ha ka sorkar pyrdi wei daw ktah ko hadooh kiwon kiwa daw ye u chimbynta ha ka Election wei ka ri kam ka India wa em ki jaitbru wa boon jait kat chawa lai, emkaam waroh u yoh ki ya kiwa mihkhmat.

Da pynkynmoo u wa ya ka India da seiñ deiwa wan pynyabi ki jylla wei ymtoh deiwa pait ya ka niam wei em leh kiwa da chah pynbor deiwa pynyang suoli yow soi ya ka Instrument of Accession.

Kamtæ da ong wa lada pyrchang bait wow pynbor ya ka yurim Hindu daw dooh syndon wei daw kyllooh i synchaar paidbah iwa khlem da leh chiliang ya kiwa chong chnong.