Lehkmen ka JNC ya ka World Clean Air Day deiwa thung dieñ hajan ka kchaaid Moopun

Ka seiñ JNC ynnin ka sngi da chimbynta lang ko wow lehkmen ya ka World Clean Air Day hajrong ka phang yong uni u snem wa ong “Together With Clean Air” deiwa lai thung dieñ ha ka chnong Mutong hajan ka kchaaid Moopun wa em ha East Jaiñtia Hills District deiwa emlang ki dkhot ka San Chnong Circle deilang wa ki dkhot ka CEC.

Da ya emlang leh wa u waheh chnong ka Mutong, u Marshi Dkhar heiwa neiliang u Chairman ka Environment Committee ka seiñ u Nini W Sungoh da ong u wa i thung dieñ ha kini ki sngi man ko kawa emkaam bha khamtam wow yada ya ka wei wow pynneh pynsah yaka bei rym-aw wei yow miat ka chnong ka thaw, kamtæ da kyntu u leh ya kiwi wow sñiawbha ki wow ya ksohkti lang neibhah chiboon ki dieñ ki siej da jan wiar ki na kani ka thaaiñ.

Neiliang u President ka San Chnong, u Keling Phawa da ong u wa i boon ki karkhana Coke wa ki karkhana pynmih khyndaw-bilat da wanrah ko ya ka la-ær wa sih wei kamtæ i toh u chimkhia i wow thung da ki dieñ khnang yow ye u wanrah biang yaka la-ær kawa khooid.