Ynne ka sngi man ko ka wow sahkynmoo ya ka manyung ka Pynsakhiat Dkhar na Loomsohsale, Kyndongtuber, West Jaiñtia Hills heiwa da yoh ko ya i yung wa da chna sñiawbha da u D. Laloo uwa man leh u President ka MPUF-Central Body.
Ha kani ka sngi da em ka yalang wa tbian chwa wow e kti ya u chabi ha pchem ini i yung heiwa ya ka yalang da pynlai da u Pastor D. Tang, hei emlang kiwi kiwa kitkaam ka seiñ, ka chnong wa kamjooh ki janyung jansem.
U Pastor da khana u wa heipor wa joor u slap da hap sah ka Pynsakhiat cha ki payu para yong ka wei khamtam wa man ko ka bru wa duna hei yoh i laa wei em ko san ngut ki khon wei man ko kawa da dooh leh ya u kurim yong ka.
Da khana u wa mar yoo u yeini, da pyntip u ya u D. Laloo uwa da wan smat wow pait ya i yung yong ka wei da kular u wow chna ya ini i yung yong kani ka manbei.
U Waheh Chnong ka Kyndongtuber, u Shiwa Siangshai da yaroh wei da e khublei u ya ka seiñ heiwa da ong u wa i em ka seiñ man ko kam i kyrkhu ya ka jaitbru waroh kawi deiwa e khublei kyrpang u ya u D. Laloo.
U D. Laloo hawa e yei klam da sñiawkmen u wow ye u pyndep ya ini i kaamram wow chakri ya ki paidbah deiwa e khublei ya ki mistri kiwa da kreh wa kiwi kiwa da emkti wow pyndep u chna ya ini i yung.
Da ong u wa em chiboon ki kaam wa da booh thong wow pyndep ya ki paidbah wei da em sa 4-5 tylli ki yung kiwa daw kreh neini chaphrang neibynta kiwa emkaam sakhiat ya i yung wa paka.
Chooh chooh da ong u wa em ki por dooh thiah neibhah wym jooh ye u yarap ya ki bru manda emkaam yarap ki tangwa ngait skem u wa i kreh bha u pteiñ i neini chaphrang.
Da khana u wa heipor wa wan yoo u nyngkong ya ini i yung ka Pynsakhiat ym yohsa u khlem yarap de ya ka.
Neiliang ka Pynsakhiat da e khublei ko ya u D. Laloo uwa em i mynsien wow yarap ya ka yung yong ka.
Ya ini i yung da sdang chna ha ka 9 Wisu (Mar) 2023 ha i lut wa T.3 lak tam.
Kiwi kiwa da klam kynthup ki ya u Waheh Dong ka Loomsohsale, u Pyllang Chyrmang wa na u Secretary ka seiñ u Aimonbha Syad.
Discussion about this post