U Montri Rangbah ka jylla, u Conrad K Sangma hawa jubab yei pynemkaam ka sorkar pyrdi yei pyrtuid Bharat heithaw India, da ong u wa i pyrtuid India kamjooh i Bharat toh iwa da em leh hapoh ka Constitution ka ri wei i pynemkaam toh chong hei ktien wa pynemkaam hawa yaklam.
U Conrad hawa yaklam wa kiwa thoh khubor ynne ka sngi da ong wa i pyrtuid India wa Bharat toh kiwa da tipmit da ka riti synchaar ka ri namo ka Constitution wei da em kiwa da pynkulmar paidbah khlem i daw.
“Hawa klam O dei Hindi, u khut O ya ka ri kam ka Bharat wei manda klam dei English daw pynemkaam yei pyrtuid India. Waroh ar tylli ki pyrtuid kitæ ka India wa Bharat toh iwa da tipmit hapoh ka Constitution, kamtæ ymtoh iwa bakla wei ini toh wa em kitu kiwa kwah u thooh kajia hawa ym em daw iyi iyi leh,” da ong u Conrad.
U Conrad da ban joor u leh yei emkaam wow bood yeiwa da kdaw hapoh ka Constitution neibhah oo manda klam hi u dei Hindi da pynemkaam u yei pyrtuid Bharat.
“Ini waroh chong i du hei pynemkaam dei kyntien wa biang wei ymtoh iwa bakla lada pynemkaam dei pyrtuid India næ Bharat. Chong donhi hei pynemkaam wei ka Constitution chah ko ya i wow pynemkaam da i pyrtuid wa kwah i wow pynemkaam,” da pynkut u Conrad.
Discussion about this post