Hadien wa ini wa dep da em kiwa chong chnong ka Nartiang kiwa da phah khubor wa ki paidbah ka chnong Nartiang da kyrchaan ki ya u khynroo Yoowanmi Myria kam u kyrtong MDC naka Nartiang-Umladang Constituency yow yaleh pyrchah ya u CEM ka JHADC wa katni.
Neiliang won kiwi kiwa chong chnong ka Nartiang da phah khubor ki wow ong wa ini toh i yahbakla wei kawa khlem yurim kawa da pynmih khnang da ki kattu katni neibynta wow yoh nong ha ka saaiñ hima wei heijooh i por yow yahbakla ya ki paidbah wa boon wa lang wei wow pyndooh burom ya kiwi won ki kyrtong.
Da pyntip leh wa hei yong sakhiat wa ha ka 25-08-23, neiliang ka Dorbar Chnong Nartiang da yaklam bniah ko ya kani ka phang Election MDC 2024 wei hawa kut hi ka dorbar ym em rai ko wow pdiang næ kyntait ya kiwon kiwon kiwa yaleh tangwa u pyrchang wow pynkhun ya waroh kam ki tre chnong khamtam wa kini kiwa kwah wow yaleh Election da em ki jar jiar kiwa kyrchaan ya ki.
Kamtæ da ong wa iwa pynlait khubor ini wa dep toh du wow pynhiar dor wei pyndooh burom ya ka Dorbar Chnong Nartiang wa ya u paidbah yong ka Constituency.
Da kyntu leh ya kiwa yahkhmat ka chnong Nartiang wym toh u e li ya kiwa chim kabu wow leh ki kamni neibhah ym em aiñ wa ye u khang pyrchah ya kiwon kiwon ki bru kiwa kwah wow yaleh Election.
Chooh chooh da ong wa ka Dorbar Chnong Nartiang da rai ko wow e laad ya waroh kiwa kwah wow yaleh ya ka Election MDC 2024.
Puræ leh: Rai ki paidbah ka Nartiang wow pynyieñ da u Yoowanmi Myria ha ka Election MDC
Discussion about this post