U MDC ka National People’s Party (NPP) na Sohryngkam uwa man leh u Chief Executive Member ka Khasi Hills Autonomous District Council (KHADC), u Pyniaid Sing Syiem da pynbaad u wa u khliehdooh ka Voice of the People Party (VPP), u Ardent M Basaiawmoit da emyatoh u wa u Montri Rangbah warim, u Dr. Mukul Sangma nadooh i por wa yakhih pynyaar pood yong ka MUDA Building Bye-Laws.
Da ong u wa kam u khynroo uwa kwah wow kit yei eh ka ri waka jaitbru, da yoo u ya u Ardent kam uwa yahkhmat wei da wan hei pyrkhat wa u Ardent em sakhiat u yei sñiawkhia wei manda mih ka mat pynyaar pood ya ka MUDA Building Bye-Laws ha u snem 2015, u Ardent da ong u wa daw pynsñiaw cha ka sorkar ya ini i eh.
U Pyniaid uwa jop kam u MDC ha u snem 2014 na ka HSPDP, da pynkynmoo u leh wa ha ka yakhih pyrchah ya ka MUDA Building Bye-Laws da pynman ya ka Rally ha madan Malki wei da toor cha Secretariat, tangwa hadien wa da mih na ka yalang da pdiang ya iwa da pynbna ka sorkar hajrong i pynyaar pood ka MUDA tangwa deiwa pynbait malu mala.
Da ong chooh chooh u wa hadien kattu katni por da sñiawthooh wa ym poi cheiwon cheiwon wei ka yakhih da man kam ke ko, wa da pynlut ke yei por wei pyndooh mynsien leh ya ki khynroo kiwa kwah wow chakri hok ya ki paidbah. Da ong u wa hadien itæ da mih kiwa jia wa pynyoo syndon wa toh i pynbait chwa hapyrdi u Dr. Mukul wa u Ardent ha kitu ki por hajrong ka MUDA Building Bye-Laws.
Discussion about this post