Jowai: Ka Traffic Branch ka Jowai Police Station ynne ka sngi da pyman ko ya ka yalang wa waroh ki seiñ kari kamai nadooh kiwa kamai Sumo, Indica, Alto wa ki wa kamai Local Taxi yow yaklam ya kiwa boon jait iwa ktah ya ka kamai kajih kamjooh leh ya ki paidbah wa chaniah ha ki.
Ha kani ka yalang da yaklam yei emkaam u man ki kiwa tip wei burom ya ka aiñ heipor wa yah kari. Da pynche cha ki, wa ya ki signal ym toh u pynemkaam bakla wei lada kwah u lai cha timun toh u pynyoo ya signal wa cha timun wei lada lai cha tidiang yow pynyoo cha tidiang wei lada e laad ya kiwi ki kari u chim pass toh u pynche da ka signal cha tidiang ym toh cha timun kamwa leh kiwa boon cha i.
U ma D. H. Pde, Traffic Incharge Jowai leh da pynkynmoo u wa ym hoi u yabood jaan ka wi ya ka wi ka kari neibhah lada sangeh syndet u wa yah na khmat ym jooh dam u mih i chah tyrrah.
Da pynkynmoo u leh ya kiwa yah kari wow burom ya ki thaw kaap chilliang sarok ki paidbah kiwa tip kam ki Zebra Crossing deiwa lai suki yow yoh ki paidbah u lai.
Da kyntu leh ya ki wa yah kari kamai wym hoi u dih sikret ki hapoh kari kamai hanlada em ki samen leh wei lada chem wa kiwa chong kari dih sikret ki hap su fine T. 300 heiwa T. 150 u su uwa dih sikret katwa T. 150 won u su u driver wa chah u dih sikret hapoh kari.
Hei yatoh wa ki kari samen won lada chem wa dih sikret ki hapoh ki kari yong heiwa emlang ki khynnah daw pynchitom ya ki.
Neiliang u J. Wallang SI da ong u wa katni wa da sdang kiwa uiñkesuwari u wan hiar cha kiwa boon ki thaw hapoh West Jaiñtia Hills da pynkynmoo u ya kiwa yah kari wym hoi u chim kabu ki ya ki deiwa pynku dor bai kari.
Neiliang kiwa yah kari da pynsñiaw ki yei eh i khoo yong ki nadooh wym biang ki thaw pynyieñ kari, kiwa kamai tooh wa kiwi kiwi de. Yeini waroh ki pulit da kular ki wow krehlang wa ki.
Discussion about this post