Sdang ka e sikai chna tiar ya kiwa duna bor khmat wa hikai da uwa duna bor khmat hi

U Lahkmen Rymbui, MLA ka Amlarem Constituency ynne da wai u ya ka e sikai kawa chi bnai neibynta kiwa duna hei bor khmat kawa da pynman ha ka Training Centre ka SURE wa em ha chnong Moosakhia, West Jaiñtia Hills.

Kani ka e sikai toh kawa da pynman da ka Society for Urban and Rural Empowerment (SURE), kawa man kam ka Training Partner ka Meghalaya Skill Development Society (MSSDS) heiwa uwa e sikai toh u Kelvin Suting naka District Commerce Industries Center (DCIC) uwa da tipmit kam u Master Trainer wei uwa da yoh khusnaam leh.

Kiwa chah hikai toh 7 ngut kiwa daw sah dei sah ha kani ka chnong heiwa da pynkhreh leh yei thaw thiah thaw dem yong ki.

Neiliang u Lambormi Suchen, Skill Development Officer ka West Jaiñtia Hills da pyntip u wa kani toh ka sien nyngkong wa da pynman kam kani ka e sikai ya kiwa duna bor khmat wei daw sikai ya ki kammon u chna saroo wa kiwi ki tiar thaiñ da ki chken ki siej wei da ye wow leh yeini deiwa chimkhia ka SURE wa u Kelvin Suting wow pynkhreh ya ka Syllabus waka Training Manual yow ye u sdang yeini.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U Kelvin Suting kam u wym chynna de i bor khmat, da khana u wa i rukom e sikai toh dei bor tba donhi ki kti, wei oo leh kam uwa man kam ki hi sñiawthooh u kammon emkaam kiwi neibhah nachwa oo heipor wa lai u cha ki thaw sikai neiliang kiwa hikai ym tip ki kammon eh ya ki kiwa duna bor khmat.

Kamtæ da ong u wa iwa da pynkhreh wow e sikai toh iwa da leh kyrpang deiwa sñiawthooh yei emkaam kini kiwa man kam oo hi.

U Krishna Phawa uwi na kiwa wan wow chah sikai da pynsñiaw u yei thrang yow yoh u man kam u Kelvin wei da kyrmen u leh wa ini daw yarap ko ya oo wow ye u wow khih yow im-ja sngi.

Neiliang u Lahkmen da ong u wa waroh em ki jar jiar i sap, i bor pyrkhat heiwa em ki bru wa biang i doh i pran wa i bor jabieñ ym ye ki wow pynemkaam hok ya ki. Kamtæ da e mynsien u ya kini kiwa chah sikai wow bood ya ki dak kjat u Kelvin yow poi chei jop wei da pyntip u leh wa ka sorkar em ko ki Scheme neibynta kiwa duna bor khmat.

Neiliang ka SURE da yoh i klam na u Dr. H.H. Mohrmen uwa da ong u wa kani ka sikai toh yow pynyoo wa bakla i kyntien wa ong kiwa thlah ym ye ki wow yahkhmat ya kiwa thlah hi.