Kiwa ha-yung u Chalan Me Dao Lyngdoh (21 snem) uwa man kam uwa kamai kari Sumo uwa chong wa sah ha chnong Mutong, Elaka Nongkhlieh da pyntip ki wa da wiar u la chi bnai tam kattu nadooh u Naikhynde uni u snem wei ym pu em chem ya oo hadooh kattæ leh.
Katkam ka FIR wa da e ha ka 29 tarik u Naikhynde ha Umpleng AD Camp da pyntip wa da wiar u nadooh ka 20 tarik u Naikhynde hadien wa ong u wa lai emkaam u cha Latyrke, East Jaiñtia Hills.
Ha ka 19 tarik u Naikhynde, u Chalan deilang wa u payu u da mih ki heipor 6:30 i step da ka kari kamai Sumo ki yow lai cha Khliehriat wei hadien da lai won cha Yaaw Cement yow lai thied khyndaw-bilat hadien wa em wa phah thied wei da liwan biang cha Khliehriat heiwa u payu u da e u Rs. 20,000 cha u Chalan yow lai thied khyndaw-bilat u neidaw wym yoh khyndaw-bilat ha katai ka sngi wei da lai sah u cha Pther wa em hajan Yaaw Cement wa uwa emyatoh ki katwa u payu won u da lai sah u cha Sutnga cha yung khon u.
Ha ka 20 tarik u payu da yachem u ya u Chalan heipor 11:00 waje i step ha Yaw Cement wei ha katia ka sngi leh ym em yoh ki wow thied khyndaw-bilat wei heini i por u Chalan da ong u wa daw lai emkaam u cha Latyrke wei da chim noh u payu ya u chabi kari na oo yow lai kamai. Kamtæ manda poi kamwa 2:30 i sngi, u Chalan da Phone u cha u payu u wym pu em dep kaam u na Latyrke, hadien ini u payu da lai yah u ya ka kari cha chnong deiwa emlang kiwa chong khari kiwa da jhan.
Hei step ka 21 tarik neiliang u payu da lai u cha i yung wa chong wa sah u Chalan heiwa ka kurim u da pyntip ko wym em wan yung u ha ka miet ka 20 tarik, kamtæ da pyrchang wow Phone ya oo tangwa ym em jubab wei hadien kattu katni por ka Phone u da man ko kawa da tympleh (Switched Off).
Hadien ini da pyrchang wow thooh ya u Chalan tangwa ym em de chem ya oo, wei hadien wa kylli takit na ki bru wa yoo ya u Chalan ha ka 20 tarik, da pyntip ki wa da yoo ki ya oo wa uwi u bru wa tip kam u Khong Sutnga uwa na ka chnong Khaidong heipor step hachwa wow lai e u ya ka kari cha u payu u wei da tip leh wa da emlang u wa u Khong Sutnga hadooh i por miet katai ka sngi wa wiar u.
Chooh chooh u bru wa phah thied khyndaw-bilat uwa na ka chnong Bamkhosngi da khana u wa heipor wa Phone u ya u Chalan da khana u wa da lai liwan u cha chnong wei dang poi u cha chnong Khaidong.
Heipor wa wiar u Chalan da sap u ya ka sulapoh rong soo waka patlun (Jean) rong yong.
Kamtæ neiliang kiwa ha-yung da kyrpaad ki ya kiwa chem næ kiwa tip chaphang u Chalan wow Phone ki ha ini i Number-7005169582.
Discussion about this post