Ki paidbah ka chnong Moodymmai, West Jaiñtia Hills District ynne ka sngi da ya mih ki wow lai paidbah ha ki soodong ka chnong wow pynsñiaw yei pyrchah yei rukom krehkaam u waheh chnong wa katni u Joseph Pariat, deiwa pynbaad wa oo da synchaar embor u najrong wym em che i krehkaam u heiyatoh waka poisa poilaiñ næ yukheiñ yudiah iwa yatoh waka chnong.
Ki paidbah da pynbaad ki wa ka poisa ka chnong toh ka wym em biang yukhieñ neibhah ya kani ka poisa da toh u yabhah hapyrdi kiwa chong chnong wei ym chaniah de ki yei rukom kheiñ sap kheiñ tap yaka poisa.
Heini i lai paidbah, da rah haroh ki yaki lama yong, ki Placard deilang i kbai dawa hiar chuki ya u waheh chnong, kamjooh leh da dawa ki naka JHADC wow pyndooh noh yei man waheh chnong wei wow thung chwa noh da u Acting Waheh Chnong khnang wa ki kaam chnong u man kiwa lai bait.
Lyngba ki Placard wa rah ki da yoo yei thoh wa ong “Ka Dorbar ka chnong Moodymmai kawa da chong haka 06-11-2023 wym chaniah de ko ya phi Waheh Chnong, Secretary Chnong chirup waka EC.”
“Dawa i yei hok, wym e laad i yaka baamsap bampong u synchaar ko hapoh ka chnong yong i”.
Hawa yaklam wa kiwa chong chnong wa chimbynta ha kani ka lai paidbah wa kynthup ya u C. Roy Laloo, ong u kani toh ka sien nyngkong wa da chim ki wow pynyoo heiyatoh waki kaam leh embor u waheh chnong wei i daw wa poi ki cha uni u pood mih paidbah leh toh wa ki paidbah wym hun ki yaka Report heiyatoh waka poisa chnong wada wanrah haka dorbar kawa da man haka 15-09-2023, wei wot hawa u paidbah da thung u daka Special Committee neibynta u takit wei wow pynbait yukheiñ yukdiah yaka poisa chnong leh tangwa u waheh chnong ym bien u wow yakrehlang.
“Tip i wa ka chnong toh kawa boon poisa wei da em leh ka rai paidbah wow saam bhah noh yaka poisa cha waroh ki manyung ka chnong, tangwa manda yoh yaka Report haka General Meeting chem i wa ka yukheiñ yudiah wym em man kawa che,” ong u C. Roy Laloo.
Da pynrap haroh u deiwa ong wa kani ka poisa toh ka hok yong ka chnong wym em wa ye u kamtre samen, wei hei sakhiat i thmu lyngba ka Special Committee toh hadien wa dadep pynbait yei sap i tap ka poisa chnong daw pyntip cha u paidbah neibynta u chim rai hei won i rukom wow pynlai ka yow myntoi ki khon ka chnong salonsar.
Kiwi won kiwa chong chnong khana ki wa wot heiyatoh i roi i paar hapoh ka chnong ka thaw leh nadooh wa chimkti da uni u waheh chnong wym jooh tip ki iyi iyi hanla kwah tip yei hok leh.
Discussion about this post