Ka seiñ kiwa yah wa kiwa bood kari Tanker wa kit phñiang kari (Petrol/Diesel) wa tip kam ka North East Petroleum Mazdoor Union (NEPMU) da phah biang ko da ka chithi cha ka sorkar Meghalaya, heiwa da pyntip wa nadooh mynstep ka sngi ka 12 tarik ym bien de ki wow wan kit phñiang chapoh ka jylla kat hadooh wa da pynlait chwa ya ki dkhot kiwa chah kem.
Kam wow pynkynmoo wa ki pulit Crime Branch yong ka East Khasi Hills ha ka 24 tarik u Khonchonglad (Nov) da pynman ki yei kynreh ha ki 7 tylli ki thaw wa em i tooh wei khleh yei Petrol wa Diesel ha Ri-Bhoi heiwa da rah ki leh kattu katni ngut ki bru wei da khyrrup leh ya ki tiar wa kini kiwa tooh da pynemkaam ki. Wei hadien i kynreh yong ki pulit neiliang yong ka North East Petroleum Mazdoor Union da phah ko da ka chithi cha ka chnat yong ka Food Civil Supplies & Consumer Affairs deiwa maham wow sangeh yei pynpoi phñiang kari cha ka jylla, wei da ye wow pynbait noh ha ka yalang kawa da pynman ha Nongpoh hapyrdi ka sorkar wa ki dkhot ka Union.
Tangwa hadien i yaklam pynbait wa ka aiñ wa daw leh ko yeiwa emkaam ya ki bru wa emkti ha ki kaam damok, kani ka seng ynne ka sngi da phah biang ko ya ka chithi cha ka sorkar wow dawa pynlait ya ki bru wa ki pulit da kem ki deiwa maham leh wym bien de u wan kit phñiang nadooh mynstep ka sngi.
Katkam ka chithi wa da soi da u General Secretary ka Union, u Ramesh Das ya kawa da phah cha u Commissioner & Secretary ka Food Civil Supplies & Consumer Affairs ka jylla, da ong wa hadooh kattæ ym pu pynlait tang uwi leh ki dkhot wa da ya krehlang wot hadien i yasaaid da u muktiar, tangwa da chah pyndik khlem daw, wei ini da pynchrai ya kiwi ki dkhot, iwa da pynman ya ki wow rai wei ym bein de wow kit phñiang cha Meghalaya nadooh ka 12 tarik hadooh wa da pynlait chwa ya kiwa da chah kem.
Discussion about this post