Neiliang kiwa pynman ya ka Muka Fiesta 2023 kawa man leh kam chibynta ka Miss Jowai da pynbna paidbah ki ya ki jait Ticket wa ye ki paidbah u thied ha ki ar sngi wa pynman ya kani ka tamasa haka 21 wa 22 tarik uni u bnai ha Lad Mukhla, Thadlaskein, West Jaiñtia Hills.
Ha ka sngi nyngkong u pynman leh yaka yakob Miss Jowai wei daw wan sakhi leh ki bru wa pawnaam wa kynthup yaka Tejasswi Prakash kawa man kam ka Actress ha ki TV Serial wa kawa jop leh yaka Big Boss wa u Siddharth Gupta uwa man kam u Actor ka Bollywood wei daw yoh yei pynwyrngia na ki Elev8 Choir, ki Toxic Pony, ka Lily Sawian wei daw em leh ka DJ Party.
Ki Ticket neibynta kani ka sngi nyngkong sdang ki nadooh Rs. 499 hadooh Rs. 3000.
Ka Rs. 3000 toh kiwa tip kam ki VIP Donors kiwa em du kattu katni tylli donhi ki wym ye u thied Online wei ha Jowai ye u yoh na HEIJO’S Cafe Mission Compound, Jowai wa na Runo Clinic wa em ha Moosalyngkat, Jowai. Kiwa thied ya kini daw yoh ki u chong hajan bha ka Stage wei daw yoh ki leh i dih wa i baam, daw yoh ki leh u psiah cha ka VIP Lounge wa i thaw booh kari neibynta yong ki.
Ki Ticket wa ye u thied Online man ki kamni:
Ka Rs. 499 kawa tip kam ka General Entry toh kawa dei yieñ wei ym em thaw chong, neitæ ka Silver Pass kawa yoh thaw chong man ko Rs. 750 kiwa em rap chadien.
Ka Rs. 1000 kawa tip kam ka Gold Pass toh kawa em thaw chong rap chakhmat.
Neitæ won ka Rs. 2000 kawa tip kam ka Platinum Pass kawa em hakhmat dooh wei kiwa thied ya kani daw yoh ki leh ya i dih wa i baam wei u yoh ki leh u psiah cha ka VIP Lounge.
Ha ka sngi wa ar, daw em u DJ na ri Belgium uwa tip kam u Romeo Blanco, u DJ Bollywood wa tip kam u Vikash Kaser neitñ ka Jessie Lyngdoh, ki Snow White wa ki Summer Salt.
Ha kani ka sngi wa ar, ki Ticket man ki Rs. 499 hadooh Rs. 1500.
Ka Rs. 499 kawa tip kam ka General Entry toh ka wym em thaw chong, ka Rs. 1000 toh kawa tip kam ka Fan Pit wei kani toh kawa dei yieñ tangwa hajan bha ka Stage wei kiwa thied ya kani ye ki leh u psiah cha ka VIP Lounge.
Ka Rs. 1500 won toh kawa em thaw chong hajan ka Stage, u yoh ki leh u psiah cha ka VIP Lounge deilang wa i thaw booh kari.
Kitu kiwa kwah u thied Ticket pyn ar sngi, ye ki wow thied da ki Season Pass kiwa em le jait, ka General Entry da man ko Rs. 750, ka Golden Pass man ko Rs. 1750 katwa ka Platinum Pass won Rs. 3000.
Kini ki Ticket toh kiwa ye phi u thied na ki dukan wa boon wei ye phi leh u thied Online deiwa lai ha kani ka link https://www.skillboxes.com/events/muka-fiesta.
Discussion about this post