Jop ka Emichwa Daka Ladia yaka pangsnget Miss Jowai 2023

Ka Miss Jowai 2023 kawa da pynman kam chibynta ka sngi nyngkong ka Muka Fiesta ha Wahsang, Ladmukhkla, da em 13 ngut ki khyllood kiwa na kylleiñ ka Ri-loom Jaiñtia kiwa da mihkhmat yow jop ya ini i naam kiwa da wan na kiwa boon ki chnong kam na Namdong, Nongjngi, Mowkaiaw, Ummulong, Shangpung, Mukhep, Tluh, Jowai wa kiwi de ki chnong.

Ya kani ka yakob da pynman soo kylla deiwa sdang da ka ‘Blended Ancestry’ (Traditional Fusion) heiwa kiwa chimbynta da riam ki da ki riam tynre ka thaaiñ Nort East nadooh ki riam Mizo, ki yong ki Pnar, i yong Khasi, yong Garo wa kiwi de.

Haka kylla wa ar won da pynman ya ka ‘Waste2Wear’ (Sustainable Round) heiwa da riam da ki riam wa chna na ki mar wa da kheiñ jhep tangwa da pynkylla ya ki cha ki riam ki bait wa miat deiwa pynemkaam da ki Plastic, ki klong Plastic, ki DVD, snop kwai, ki kot khubor wa kiwi kiwi de.

Ha ka kylla wa le wa tip kam ka ‘Long Summer Fun’ da pynyoo ya ki riam pyngngaad wei hadien ini da jied ya 8 ngut kiwa yoh u lai chakhmat yow u jubab yeiwa kylli kiwa wan wow bichaar.

Hadien ini da jied won sa 5 ngut kiwa da hap wow jubab yei jooh i yukylli iwa yatoh wa i HIV/AIDS.

Neiliang kiwa bichaar wa kynthup ya ka Patricia Mukhim, ka Sweety Pala, u Jitesh Thakur, ka Nunui Rualhleng wa u Richan Pariat da yoo biang ki wow jied ya ka Emichwa Daka B Ladia kawa 18 snem i rta naka chnong Mustem wow yoh ko yaka pangsnget ka Miss Jowai 2023 kawa da pyndeiñ da ka Miss Jowai warim ka ka Lameca Passah.

Yei naam 1^st Runner Up da yoh da ka Ribhamika Rymbai kawa na chnong Ummulong wei kawa dang lai puræ BA katwa yei naam 2^nd Runner Up da yoh da ka Salina Najiar kawa na Iongpiah, Jowai kawa dang lai puræ BSC.

Ka Emichwa deiwa jop yaka Miss Jowai da yoh ko leh wow psiah yow yaleh sa ka Mega Miss Northeast.

Kawa jop Miss Jowai da yoh ko leh yaka song poisa kawa Rs. 1,20,000, kawa yoh 1^st Runner Up da yoh Rs. 75,000 katwa kawa yoh wa le da yoh ko Rs. 50,000.

Da saam leh ki Sub Title heiwa yei naam Miss Sustainable Eco Tourism da yoh da ka Hearty Suja, yei naam Miss Congeniality da yoh ka Na-i Rympei Suiam, yei naam Social Sensation Champion da yoh ka Mandakaru Tyngkan, yei naam Miss Perfect 10 da yoh ka Emichwadaka B Ladia, yei naam Miss Photogenic da yoh ka Na-I Rympei Suiam, yei naam Most Beautiful Skin da yoh ka Salina Najiar, yei naam Most Beautiful Hair da yoh da ka Mandakaru Tyngkan katwa yei naam Miss Talented da yoh da ka Hearty Suja.

Ha kani ka yakob da em leh i pynyoo riam da ka Butterfly Clothing & Accessories, Shillong wa na ka Sewing Threads kawa man ka thaw e sikai soor wa em ha Jowai.

Kamwa da kular, da wan wow chimbynta deiwa mihlang ha ka rynsan da u Siddharth Gupta waka Tejasswi Prakash kiwa da pynkmen ya ki paidbah wa da wan wow sakhi.

Da yoh leh i rwai i chaad naka Lily Sawian wa ki lok ko, ki Toxic Pony wa kiwi de.