Ka Dorbar Chnong Amlarem daw pynman ko yaka tamasa wa ar sngi kawa tip kam ka Amlarem Winter Festival haka 29 wa 30 tarik uni u bnai heiwa daw emlang leh ka yakob miat kynthai wa tip kam ka Miss Amlarem kawa daw sdang haka 29 tarik wei daw jied ya kiwa jop haka 30 tarik.
I thaw wow pynman toh ha madan yalehbol ka chnong Amlarem wei u sdang kani ka tamsa nadooh 3:00 waje noh chariñ ka sngi ha waroh ar sngi heiwa daw emlang leh kiwa tem wa put wa pawnaam ka jylla.
Ha ka 29 tarik daw wan rwai u Gilbert Thongni uwa na Nongstoin uwa rwai yei sur wa pawnaam wa tip kam i Ngan Iaid Khlem Maphi, neitæ u Juice D Kid uwa na Jowai wa ki Thebeniarr kiwa man kiwa tem wa pawnaam ka thaaiñ War Jaiñtia.
Ha ka 30 tarik daw wan tem ki Thunder’s Cave kiwa na Nongstoin, ki Nexus kiwa na Jowai, ki Famps Band kiwa na Trangblang wa u Dbryn uwa na Shillong.
Ha kani ka tamasa daw em leh boon ki baam ki dih, ki jait yalehke kam ka Lucky Dip, Spinning Wheel, Duck Fishing, Beer Fishing, Balloon Shooting, Tyre Shooting, ka Bumper Housie waka Royal 360 kawa riñ dur deiwa pynskit langdon yaka Camera.
Kamtæ da khut sñiawbha ya phi wow ya wan ki cha kani ka tamasa kawa daw man kawa sahkynmoo.
Discussion about this post