Ka Jaiñtia Students’ Movement (JSM) Eastern Region deilang waka JSM Wapung Unit hadien wa tip ki yeiwa jia ya ka manbei wa tip kam ka Lita Ryngkhlem kawa na chnong Wapung Chnong kawa da wiar nadooh ka 25 tarik u bnai wa dep wei da chem won yei metyap ko haka 31 tarik ha i thaw wa haap ha ka chnong Mookhep, East Jaiñtia Hills District, ini da pyndap ya ka seiñ dei chrai hadooh kattæ kattæ wa na iwi i por cha iwi da jia ma jai kamni ha ka thaaiñ khamtam ya ki kynthai, ki khynnah kiwa da chah thombor ha ki bru wa thrang snaam kiwa pynyap dusmon khlem da em de ka mynsien tip para bru.
Kamtæ hajrong ini i chah tynyap dusmon kani ka manbei, neiliang ka seiñ JSM lyngba kiwa yahkhmat yong ka da thooh ki ki laad ki luti wow booddien wei da suba ki ya uwi u bru na ka slipar wa da chem hajan i metyap ka Lita Ryngkhlem wei uni u bru toh uwa tip kam u Monkiru Chyrmang (29 snem) uwa da jooh khut siñ kam u Swet.
Ya uni u bru da kem ynnin i janmiet ka 1 tarik ha chnong Mookhep hadien wa tim sih tim sang u hapoh ka chnong wei da kem ya oo da ka VDP Mookhep wa ki bor chnong heiwa da e kti ya oo cha ki ki pulit ka Ladrymbai Police Outpost yow leh ya iwa emkaam.
Hawa takit ki pulit ya uni u bru, da phla wa toh oo wa tynyap ka ka Lita Ryngkhlem ha i khloo wa chem yei metyap tangwa da ong u wym mut u wow tynyap tangwa da ksih u ka na rdang wei hadien ini da yut u neini i thaw khlem da tip wa da yap ko wei du hadien wa mih khubor tip u wa da khlaad noh ko.
I daw wa poi chei ksih u ka toh hadien wa mih i awri i ya kajia hapyrdi yong ki.
Kamtæ ka seiñ da ong ko wa ini i jia da booh ko hei maa ya ki kynthai, ki khynnah ki wym yoh de u im suk im saaiñ haka imlang sahlang.
Hajrong i yoh kem ya uni uwa emkti, neiliang ka seiñ da kyntu ko ya ki bor aiñ wow pynchitom deiwa eh ya kam kini ki bru deiwa pasi syndon khnang wym jia de ha ki sngi kiwa daw wan.
Ka Wyrta na u President JSM Eastern Region, u Wellson RD Siangshai wa na u Kerbhame Dkhar, President JSM Wapung Unit.
Discussion about this post