U Wailadmiki Shylla, MLA ka Jowai Constituency ynnin ka sngi da wan u wow wai yaka Fete yong ka chnong Ialong kawa da pynman kam chibynta wow pynmih poisa yaka skur chnong kawa tip kam ka Ialong Secondary School Ialong heiwa da yoh leh wow pynku kyrdan ya kani ka skur.
Ka chnong da pyntip ko wa da dep ko dei mynsien wa kmen wow ong wa hadien 40 snem i lai luti kani ka skur da yoh wow pynku kyrdan ya kani ka Secondary School Ialong cha ka Ialong Higher Secondary School Ialong hapoh i pynlai u waheh chnong uwa man leh kam u Chairman yong ka SMC, u T. Ram Phawa dei ya krehlang ki dkhot ka EC waka SMC.
Ya kani ka yalang da pynlai da u Lehbha Phawa wa man u Chairman ka Fete Committee heiwa da yoh i klam na u Secretary ka Fete Committee, u Morningstar Dhar wei da yoh leh yei klam naka Headmistress yong ka skur, ka Neiniroibok Shylla kawa da klam hajrong ka phang ka rukom lai luti kani ka skur wa i eh wa i duna wa boonjait.
U waheh chnong heiyatoh wa kani ka Fete yong ka Dorbar Chnong Ialong, da khana u wa man ko kam chibynta wow lum yarap poisa na u paidbah wa i e sñiawbha hei dur ka Donation khnang yow ye leh u su tulop ya kiwa sikai kawa dapoi Rs.7 lak chi snem kamjooh leh yow pynbiang ya ki kamra skur ki khynnah skur nadooh Class VI hadooh Class X.
U waheh chnong uwa jooh man leh kam u khynnah skur yong kani hi ka jooh ka skur ha u snem 2004 hadooh u snem 2008 da angnood u wow pynku kyrdan ya kani ka skur cha ka Higher Secondary School (10+2) ha ka yurim wa jooh man u kam u President yong ka KNGCSU (Kiang Nanbah Govt. College Student Union) wei da jooh yoo u leh yei jinjar ki khynnah wa pyndep Matric wow yoh lai puræ Class XI-XII cha kiwi tawon ki skur næ College neitæ i daw da angnood u wow pynku kyrdan noh ya kani ka skur wa pait da ka Dorbar Chnong Ialong.
Ha kani ka yalang da yoh leh yei klam na u Sajar Lyngdoh uwa man u Asst. Joint Inspector yong ka District School Education, pynbood sa u Wailadmiki Shylla uwa da klam heiyatoh wa i kaamram yong oo kam uwa mihkhmat wa thrang bha i mynsien yong oo wow pynku yei miat i bha ha ki liang yong i puræ puthi, heijooh i por leh da man u uwa da jooh theh ya chiboon bah ki Scheme yarap ha kani ka skur ha ki snem wa dadep wei da e yarap u leh neibynta ka Extension Building ha u snem 2022-23 kamjooh da kular leh wow e sa Rs. 5 lak ha uni u snem 2024-25 neibynta wow pyndep yaka Extension building wa dang sahteiñ wei wow nang theh chooh chooh ya ki Scheme pynroi ha kani ka skur wei wow thooh laad leh wow wanrah ya kiwa sikai ha kani ka skur khnang yow nang miat i rukom pynlai ya kani ka skur.
Ha kani hi ka jooh ka sngi, u Wailadmiki Shylla da pynlait paitbah u ya ar tylli ki Power Tiller naka Scheme SRWP 2023-24 cha ka chnong Ialong neibynta wow e yarap ya ki warep ha kani ka chnong.
Chwa wow pynkut ya kani ka yalang da e khublei pynwai da u Secretary yong ka Dorbar Chnong Ialong, u Masan War neibynta waroh kiwa ya ksohkti lang cha kani ka yaaw Fete yong ka Dorbar Chnong Ialong.
Discussion about this post