Ka Regional Democratic Alliance (RDA) kawa kynthup yaka United Democratic Party (UDP) waka Hill State Peoples Democratic Party (HSPDP) ynne ka sngi da sdang ko yei yalap Election neibynta u kyrtong wa ya monlang ki, u Robertjune Kharjahrin wow yakhun naka Shillong Parliamentary Constituency deiwa pyntipmit ya uni u kyrtong haka yalang wa da pynman ha yung krehkaam seiñ ka UDP ha Shillong.
Ha kani ka sngi da pyntipmit ya u kyrtong cha waroh ki MLA, ki MDC wa cha kiwa yahkhmat yong waroh ar tylli ki seiñ saiñ pyrthai.
U Robertjune hawa e yei klam haka yalang da kdaw u ya ki kattu katni ki phang wa da pynkhreh yow hiar lai yalap Election kiwa kyntup yei dawa pynkrehkaam yaka ILP, i pynpsiah yaka ktien Khasi haka 8th Schedule, ki kaam khappood, i emkaam wow yoh noh yaka yong i hi ka IAS Cadet, ka roi ka paar, i chah thombor ki paaid Khasi wa sah ha Bangladesh, i pynkhlan yaka 6th Schedule wei boon bah kiwi ki phang kiwa man kiwa sahteiñ wow klam neini chakhmat.
“Nga ym kwah O wow yaleh Election deiwa kdaw yei duna yong kiwi, næ wow pynbaad wow pynbood naam ya kiwi. Nga u lai O cha ka Election deiwa tyrwa ya ki phang yong ka jaitbru, ka jaitbru u sai ko du uwi donhi u bru wei lada ki paidbah jied ki deiwa pynchong yurim deiwa bang i rwai næ pynchong yurim deiwa sñiaw niam næ deiwa sñiaw ya kiwa ha-yung ha-sem, ini mut i wa da bakla nadooh wa sdang,” da ong u Robertjune.
Da ong u wa i kaamram yong kiwa yahkhmat haka saiñ hima sima ymtoh wow lai pynsñiaw yeiwa eh ha ki paidbah tangwa toh u chim yei kitkhlieh. “I toh u thooh i ya ki luti wa ye u pyndam yei eh ymtoh wow man kiwa khana yei eh cha ki paidbah. Kamtæ hawa jied phi, da pyrkhat wei pynchong yurim hajrong ki phang kiwa nga daw tyrwa O hakhmat yong phi,” da ong u.
Discussion about this post