Ka Voice of the People Party (VPP) ynne da pyntip ko wa da rai ko wym chimbynta ko haka Dorbar Mang Tangka lada u Lat wan e u yei klam u du hei ktien Hindi khlem da em wa pynkylla cha ka ktien English.
Yeini da pyntip leh cha u Lamphang ka yung dorbar, u Thomas A. Sangma ynne ka sngi.
Neiliang u Heavingstone Kharpran, Secretary ka VPP Parliamentary Party, da ban joor u yeiwa emkaam kani ka dorbar neibynta ki paidbah ka jylla.
Ha ka chithi wa da e cha u Lamphang, da ong wa waroh ki MLA emkaam ki wow sñiawthooh yeiwa jia hapoh ka dorbar neibhah da dep jia ini heiwa u Lat da e u yei klam dei ktien Hindi, i wym em man iwa miat ya kiwa mihkhmat paidbah.
Chooh chooh da ong wa ka ktien Hindi ymtoh ka ‘Official Language’ ka Meghalaya, wei neiliang ka Party da kyntu ko leh ya u Lat wow e yei klam u hei ktien English. Wei lada chem chitom u toh u booh da u bru wow pynkylla cha ka ktien English ya waroh iwa klam u.
Deiwa leh yeini, ka VPP da yooluti ko wa daw man iwa khooid yei pynlai yaka dorbar wei lada ym leh yeini, neiliang ka VPP ym chimbynta ko hapoh ka dorbar lada ym ye u pynbait yeini.
Discussion about this post