Uwi u manpa da pynkut u yei mynsien u khon hi u uwa dang 14 snem deiwa e bih hadien wa khlan u khon u pait phlim waheh ha ka Mobile Phone u wei da yoh i ood i naam naka skur wa pynjaaw u leh ya ki khynnah kynthai.
Ini toh iwa da jia ha Maharashtra wei uni u manpa toh uwa tip kam u Vijay Battu uwa kreh kam uwa soor that wei da sahlang u waka kurim deilang wa ar ngut ki khon haka chnong Solapur.
Uni u manpa nyngkong da murieh u yeini i kaam wa leh u khlem da khana leh yaka kurim heiwa haka 13 tarik u bnai nyngkong uni u snem da lai ki wow ujor cha ki pulit wa u khon ki, u Vijay da wiar u.
Kamtæ ki pulit da sdang ki yei takit tangwa hadien boon sngi da chem yei metyap uni u khynnah na kawi ka nala wa em hajan yung hi wa sah u.
Hadien wa leh yaka Post-Mortem da chem ya i Sodium Nitrate iwa em hapoh i doh yong uni u khynnah, kamtæ ki pulit da sdang ki wow takit ya ka bei u pa uni u khynnah kamjooh ki jan yung.
Uni u manpa hawa takit ki pulit ym da ye u batai bniah wei wow jubab yeiwa kylli ki pulit.
Haka 28 tarik u bnai nyngkong, uni u manpa da phla u haka kurim u wa oo hi wa pynyap ya u khon ki neidaw wa da yoh u boon ki ujor naka skur pyrchah ya u khon wa da pynjaaw u ya ki kynthai kani ka skur wei ym em chimkhia u u khreh kot katwa ha yung won da chem u ya u khon wa khlan ware u pait phlim waheh ha ka Phone u wei katwa sneiñ oo leh ym ap u.
Da phla u wa haka 13 tarik da lai yah ke u ya u khon u da ka thuk-thuk wei da e u wow dih ya iwi i Soft Drink wa da dep khleh u wa i Sodium Nitrate wei hadien wa yapler u, da noh u oo ha u nala wa em hajan yung ki.
Neiliang kani ka manbei da lai khana ko cha ki pulit yeini wa phla u kurim ko wei da wan ki pulit wow kem oo haka 29 tarik.
Discussion about this post