U Montri Rangbah ka jylla, u Conrad Sangma hawa e yei jubab hapoh ka yung dorbar chna aiñ ynne ka sngi, da pyntip u wa ka sorkar da dep pynman ko ya ki yalang 23 sien hapoh ka Taj Vivanta waka JW Marriott Courtyard wa em ha Shillong.
Hawa pynman ya kini ki yalang, ka sorkar da pynlut ko Rs. 2,13,96,000 wei na kani kawa boon dooh wa pynlut toh neibynta ka G20 Summit kawa da pynman ha Shillong kawa da poi Rs. 62.47 lak i lut.
Da ong u leh wa ka sorkar hap ko wow pynman ki yalang kamwa da leh da kiwi ki sorkar wei da em ki por wa hap pynman kiwa emkaam kam ka G20 Summit wei da man ko iwa sarong wa ye u pynman ya kani hapoh ka jylla deiwa biang i thaw sah thaw dem ya kiwa wan na baar wei daw liwan ki deiwa kynmoo tympang yei por wa em ki hapoh ka jylla.
Da ban joor u wa ymtoh iwa phylla hawa hap pynman ya kam kini ki yalang wei da leh kamjooh ha kiwi ki jylla.
U Banteidor Lyngdoh, MLA ka Mawkynrew da kylli u wa nachwa wym em kini ki ar tylli ki Hotel da jooh pynman yalang ha ki thaw yong sorkar kam ha ka Pinewood Hotel wei da paan pynche u wa lada ka sorkar ym leh de ko kam nachwa yow lait nei lutphut.
U Conrad da ong u wa da em boon ki yalang wa pynman ha ki Convention Centre, ha Pinewood wa kiwi de ki thaw kiwa man ki yong ka sorkar tangwa chong ha kiyi ki bru wa daw wan, hadooh katwon heh ka yalang wa kiyi de kiwa emkaam kamtæ da jied ha iwon i thaw wow pynman wei ym em mut wa daw pynman du ha kini ki ar tylli ki Hotel.
Heijooh i por da ong u leh wa sñiawthooh hi u yeiwa ong u Banteidor wa lada yoh myntoi næ ym em ki tre chnong deiwa pynman ha kini ki Hotel, heiwa da khana u wa kamwa 80-85% kiwa kreh ha kini ki Hotel toh ki tre chnong.
Kamtæ da ong u wa ka sorkar u pynemkaam ko ya ki yong ka ki thaw wei kamjooh leh ya kini ki 5-Star Hotel iwa chong katwa emkaam.
Discussion about this post