Da phah yaka karkhana Coke wa tip kam ka Presidium Breez wow sangeh ko yei chna

U Montri Rangbah ka jylla, u Conrad K Sangma hawa e yei jubab hapoh ka yung dorbar, da kular u wow pait da oo hi heiyatoh wa ki 5 tylli ki karkhana Coke wa da ujor pyrchah da kiwa chong chnong ka Nonsning wa Umrasong.

Ya kani ka phang da wanrah da u MLA ka Mowkaiaw, u Nujorki Sungoh hapoh ka yung dorbar heiwa da ong u wa kini kiwa chong chnong da pynman ki leh dei lai paidbah yow pynyoo yei pyrchah u booh ya ki karkhana Coke ha chnong ki neibhah kini ki karkhana toh kiwa da dep toh kuna neidaw wa krehkaam ki pyrchah yaka aiñ wei da em kiwa su ya kani ka kuna tangwa em won ki wym em su. Wei da phylla leh wa ka Meghalaya State Pollution Control Board da pyndam ko ya ki Case pyrchah ya kini ki karkhana.

Da ong u leh wa da em boon ki bru wa yoh kjut boon jait wei ymtoh u phylla wa da yoh ka jylla yei naam Cancer Capital.

Kamtæ da dawa u na ka sorkar wow pyndam noh yei e bor namo ka Consent To Establish (CTE) yong kini ki karkhana deiwa ong wa kini ki karkhana da krehkaam ki dei miet khlem da pynemkaam kiwon kiwon ki Filter hadooh wa da yoh kjut ki bru boon jait.  

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

U Conrad da jubab u deiwa ong wa ka Meghalaya emkaam ko yei roi i paar wei ym ye wow ku, u pynmih kreh lada pait i ya waroh ki karkhana Coke kam kiwa sih. Wei da toh u pait noh deiwi rukom deiwa pyrkhat leh yaka bei rym-aw kamjooh leh ka khayi pateiñ.

Da pdiang u leh wa kini ki karkhana Coke toh kiwa wanrah yei kjut tangwa man iwa bakla lada ong wa da man kam ka Cancer Capital neidaw wa em ki karkhana.

Da khana u leh wa heiyatoh waka karkhana Coke wa tip kam ka Presidium Breez, neiliang u Member Secretary wa ki Environmental Engineer da lai pait ki ya kani haka 16 tarik uni u bnai hadien wa yoh yei ujor wei da chem wa kani ka karkhana da tyngkheiñ ko ya ki kyndon ka CTE deiwa noh ya ki tiar ki tar wot ha ki tyllong um.

Neiliang ka sorkar da phah ko yaka Show Cause Notice cha kani ka karkhana haka 19 tarik deiwa phah ya kani ka Presidium Breez yow sangeh ko yei chna.

Chooh chooh u Conrad da khana u wa daw khut yachem u wa ki dkot ka Meghalaya State Pollution Control Board yow pait yeini iwi pa iwi.

Tangwa da ong u wa lada bood ya ki kyndon, ym ye wow khang ya ki bru wa seiñ khih katwa ya kiwa tyngkheiñ kyndon daw pynchitom ki.

Puræ leh: Pyrchah ka HYC-EJH yei chna yaka karkhana Coke wa tip kam ka Presidium Breez