Ka Loompyrdi Iongpiah Upper Primary School SSA kawi na ki chlem sikai wa da seiñ ha u snem 2000 ha ka 9 tarik Wisu, ynnin da wai pyrda ko yei lehkmen dap 25 snem hei sakhilang ki dkhot ka School Managing Committee, ki khynnah skur, ki waheh wasian, ki manbei manpa, ki khynroo khyllood ka Loompyrdi Iongpiah wa kiwi kiwa chah khut sñiawbha kam ka M. Lakiang, District Mission Coordinator, SSA West Jaiñtia Hills wei ya kani ka lehkmen daw pynkut ha u snem 2025.
Ha ka yalang wa da pynman ha Madan Myngkoi Pyrdi, Iongpiah, u C. Tympang Laloo, Chairman SMC da e u ki kyntien pdiang burom neitæ yei ngoohblai ngoohsyiem da siang da booh da ka Riianom Passah, Member SMC katwa yei parom i lai luti ka skur da khana pynsñiaw da u O.H. Toi, Founder Secretary wei chooh chooh da yoh leh i klam i kappæ na ka Neetu Shullai, Headteacher Loompyrdi Iongpiah UPS SSA, ki kyntien e mynsien na u R.L. Bimee Suwer, Waheh Chnong Loompyrdi Iongpiah katwa hei pynkut da wan u C.A. Ram Kyndiah, Secretary SMC uwa da e ki kyntien sñiawngooh.
U O.H. Toi hei klam yong oo da khana u leh wa ha ka thong wow kyntu kynrong yei puræ puthi wei stat i tip hapyrdi ki bru wa chong chnong ka District, ka SMC da em yumut ko wow kyntu kyrdan ya kani ka skur wei wow chna yei yung skur ha i thaw iwa em ha Chyrmang iwa yahaap katkam i yah ka juk ka por iwa ka dorbar chnong da dep pyrkhat sani bha ko.
Ka M. Lakiang, District Mission Coordinator, SSA West Jaiñtia Hills ha kani ka sngi da wai pyrda ko leh ya u Mascot Silver Jubilee Celebration wei da pynkup burom ya ki Founder Member yong ka skur kamjooh leh da saam ya ki Certificate cha kiwa jop ha ka Drawing Painting Competition.
Hei klam yong ka kam ka kongsan iwa hakhmat da yaroh ko ya ki bor pynlai ka skur kamjooh ya kiwa sikai wa ki bei ki pa yong ki khynnah kiwa da yakrehlang chirup chirup hapyrdi i lai luti wow kynjoh cha u moomær wa 25 tylli ki snem.
Chooh chooh kitbok kitrwiang ko leh ya kani ka skur yow nang man ko kawa lai chakhmat katkam i yah ka juk ka por wei kam ka dak wow embyntalang wa kani ka skur heini i lehkmen Silver Jubilee.
Ka M. Lakiang da e kyllooid mynsien ko leh Rs. 20,000 cha ka yarong yong ka skur.
Ya kani ka sngi da pynphooh pynphieñ chooh chooh da ki chaad ki rwai wa kiwi kiwi ki rukom pynwyrngia wa da chimbynta da kiwa sikai, ki khynnah skur ka Loompyrdi Iongpiah deilang i wan pynchongchit leh kiwi ki skur wa haap hapoh ka Iongpiah Cluster kiwa kynthup yaka Chilliangraij UPS SSA, Pohmusiang UPS SSA, Panaliar UPS SSA, Little Flower UPS SSA waka Seinraij UPS.
Discussion about this post