Ha i sien wa nyngkong hapoh ka jylla, neiliang ka Meghalaya Administrative Training Institute, Shillong waka District Disaster Management Authority, East Khasi Hills District da ya krehlang ki yow pynman yaka Mock Drill yow sikai kammon wow lai pynlait ya kiwa mynsoo næ kiwa sahkut chapoh krem kawa da pynman ha krem Mawmluh, Sohra haka 9 tarik uni u bnai.
Ha kani ka Drill da e sikai ya kiwa chibynta kammon u leh lada jia iwon iwon ya kiwa psiah chapoh ka krem nadooh kiwa sahkut kamjooh kiwa mynsoo wei da pynyoo leh kammon wow pynemkaam ya ki tiar ki taar, ki Walkie Talkie wa kiwi kiwi de.
Da pynkhreh leh ya ki Standard Operating Procedures (SOP) kammon wow leh hawa lai e yarap.
Kiwa wan e sikai toh ki dkhot ka Meghalaya Adventurers Association (MMA), kiwa da pyndep yei chah sikai ha UK wa Ireland. Wei chwa kani ka e sikai ha Mawmluh da em ka yalang wa da pynman ha DRDA Hall, Shillong heiwa da em leh ki dkhot ka MMA kiwa da khana chaphang i rukom pynlait ya kiwa mynsoo, kiwa sahkut lada jia wa khih khmi wa kiwi kiwi de.
Kiwa chimbynta kyntup ki nadoh ki bru ka DDMA, MATI,SDO (C) Sohra deilang ki pulit, ki Fire & Emergency Services, ki bru ka State Disaster Response Force (SDRF), MPRO, ki Medical Team, ki dkhot ka Meghalaya Sport Climbing and Mountaineering Association, kiwa chong chnong wa kiwi kiwi de.
Discussion about this post