Ka Krishi Vigyan Kendra (KVK) Jaiñtia Hills ynne ka sngi da pynman ko i e sikai ya ki paaid warep wow kyruiñ ki u rep deiwa pynemkaam da ki sboh tynre wa yoh na ka ramaw ha jar jiar ki thaw hajrong ka thong wow pyndooh yei rukom rep sboh dawai, wei deiwa leh kamni suk haroh ki paidbah u yoh sboh.
Ya kani ka yalang pynsñiawthooh paidbah wa tip kam ka Out Scaling of Natural Farming da pynman ha Community Hall ka Lum Chyrmang Mihmyntdu wa da emlang nadooh ki sahep ka chnat Agriculture, Horticulture, ki paaid warep wa kiwi deilang wa u M.B. Tongper, Additional Deputy Commissioner West Jaiñtia Hills District kam u kongsan.
Haka yalang wa pynlai da u Mebanphikir Kharbuli, Farm Manager KVK, da yoh i klam yahkhmat na ka L. Challam, Senior Scientist & Head KVK Jaiñtia Hills wa i rwai pdiang burom na ki warep ka Mukhla.
U M.B. Tongper hawa e yei klam kam u kongsan ong u, kat nang lai ki por ki snem ki bru da nangboon nangboon ki, wei i rukom rep deiwa pynemkaam da ki sboh dawai nang pynsih ko yaka ramaw, ki um, ki baam ki dih, ka la-ær wa riñ mynsien, ka pyrthai leh da nang iñ nang iñ (Global Warming) heiwa daw ktah ko leh yaka pateiñ wow wan.
Kamtæ deiwa kyruiñ biang chei rukom rep tynre da ki sboh wa em ha ramaw deilang ki ait mrad daw yoh boon bha i myntoi, najrong wa suk u yoh sboh, duna i pynlut wei ye leh u pynmih rap boon ki mar wa rep neitæ yarap ko leh u pynneh i khooid haka ramaw wei yoh nong ki warep.
Yooluti haroh u wa lyngba kani ka pynsñiawthooh, ki paaid warep daw che chooh chooh ki rap bha heiyatoh wa i rep da ki sboh tynre namo ka Natural Farming.
Ha kani ka sngi da pynkup burom leh ya ki kattu katni ngut ki warep wa da jop hei kaam rep yong ki lyngba i yoh yarap na ki chnat krehkaam waphær waphær.
Discussion about this post