I dur yong uwi u Politician ka Assam wa thiah lang wa ki kot poisa Rs. 500 da poor i kyllieñ kylleiñ wei uni u bru toh uwa tip kam u Benjamin Basumatary, Chairman ka Village Council Development Committee ha Bhairaguri, Udalgiri District.
Uni uwa man leh kam uwa yahkhmat ka Bodoland, toh uwa da chah pynbaad wa baam tangka heiyatoh waka Scheme chna yung u Prime Minister deilang wa kiwi de ki kaam kreh spah sngi. Uni da chah pynbaad u wa chim poisa u na kiwa dooh wa duk kiwa yoh myntoi na ka PMAY wa MNREGA Scheme kiwa em hapoh ka VCDC u, hapoh ka Odalguri Development Zone.
Hadien wa boon kiwa beiñ yeini i dur ha ki Social Media, da mih boon kiwa da kylli lada dang man u kam u dkhot ka Party na Bodoland kawa tip kam ka United People’s Party Liberal (UPPL), kawa man leh ka Party kawa da yieñ ha ka yurim wow yaleh pyrchah ya ki kaam baam tooh.
U Pramod Boro uwa man leh kam u heh ka UPPL heijooh i por u Chief Executive Member ka Bodoland Territorial Council (BTC), da pynche u wa u Basumatary ym em de emyatoh u waka Party.
Da pynche u leh wa da dep beh ya u Basumatry napoh ka Party nadooh ka 10-01-24, wei da dep pynchitom oo hadien wa yoh yaka chithi naka Harisingha Block Committee, UPPL haka 05-01-24.
Neiliang ka BTC leh da beh wei da pyndam ko yei man u kam u VCDC Chairman ha ka 10-02-24.
Da kyntu leh ya ki laad pathai khubor kamjooh ki paidbah wym toh de u ong ki wa u Basumatry toh uwa na ka UPPL wei ini wa leh u toh i kaam yong oo samen wei ym ye wow kitkhlieh ya ki kaam samen wa leh u.
U Basumatary hawa pynche yeini, da ong u wa ini i dur toh iwa nadooh san snem nachwa wei da em kiwa kwah wow pynsih yei pyrtuid u kiwa da leh yeini i kaam wei daw thooh ya kitu kiwa emkti wow leh yeini.
Chooh chooh da ong u wa kani ka poisa toh kawa Rs. 3 lak kawa da chim ram u san snem nachwa neibynta ka diah u wei ha katai ka miet da lehkmen wei da chondur ka kurim u ya oo du kam wow lehke donhi.
Discussion about this post