U National General Secretary ka National People’s Party (NPP) uwa man leh kam u Symbood Montri Rangbah, u Sniawbhalang Dhar ynnin da khyrwait u ya u President ka Voice of the People Party (VPP), u Ardent Miller Basaiawmoit yei wanrah u yaka Resolution yow pyrchang pyndooh jait noh ya ki Autonomous District Councils (ADC) heipor wa man u kam u CEM ka Khasi Hills Autonomous District Council (KHADC).
“U Ardent heipor wa man CEM da wanrah u yaka Resolution yow pyndooh noh ya ki ADC, iwa man leh i pyrchang wow tlep pynim ya ka jaitbru. Tangwa da embhah wa dang em kiwa yahkhmat kiwa pyrchah yeini wei u Blai leh ym em e laad u jia iyi iyi yaka jaitbru Ynñiawtrep,” da ong u Sniawbhalang.
Yeini da ong u heipor wa lai yalap Election yaka kyrtong ka NPP, ka Ampareen Lyngdoh ha Mawryngkneng, East Khasi Hills, heiwa u Sniawbhalang da kynthah u ya u President ka VPP yei pyrchang u leh wow pynkylla sa ka dustur riti deiwa chim noh dei jait u pa.
“Ka VPP da kwah ko leh wow pyndooh ya ki jaitbru tynre deiwa pynkylla yei chim jait heithaw yong ka bei cha u pa tangwa heijooh i por ong ki maya jaitbru deiwa pynkylla yaka dustur riti kawa da bood nadooh warim wajah,” da ong u.
Da ong u leh wa u President ka VPP ha kiwa boon ki yalang paidbah da kam u wa da leh u chiboon neibynta ka jaitbru tangwa deiwa chim kabu ya ki warep deiwa wanrah da ka ah kilo ya ki mar rep.
U Sniawbhalang da ong u leh wa ka VPP toh kawa pynbiej paidbah du wow yoh Vote, “I ym em wan i heini wow pynbiej paidbah tangwa wow pynsñiawthooh paidbah ym deiwa thok yow yoh Vote.”
“Ki waheh da jooh ong ki wa em boon jait kiwa yahkhmat, nadooh kiwa yahkhmat saiñ pyrthai, kiwa yahkhmat niam, kiwa yahkhmat ha ka imlang sahlang wei iwa emkaam dooh toh u tip u burom ya idæ kamjooh ya kiwi. U maya ya idæ khlem da choon da kynchiñ ya kiwi tangwa sñiawsih wa em ki Party khamtam ha kani ka yalap Election ki wym tip de wow burom, kiwa da yap i sarom tangwa da sñiaw ki ya idæ kam ki angel katwa waroh kiwi toh kiwa pap,” da ong u Sniawbhalang.
Da ong u leh wa kiwa boon ki bru da sihlet ki neibhah wa thap Vote ki neidaw wa sñiawsuk ki ya iwi i sur Election.
“Lada maya jaitbru hap wow pynyoo dei kaam. I toh kiwa da chah jied da ki paidbah neibynta ka 5 snem yow kreh ymtoh wow chong kli kti ha Secretariat næ District Council. I toh ki chakri paidbah ym ye i wow chim tulop khlem da leh iyi iyi i kreh. Kam ka nongmuna wa u Pyniaid Sing Syiem da man MLA u chi snem chiteiñ hadien ka Bye-Election, wei da yarap u boon ki Scheme heini tangwa ha ka Election 2023 da jied ya u bru uwa pynbiej paidbah donhi,” da ong u Sniawbhalang.
Kamtæ da ong u wa yaphær bha ka VPP wa NPP, Ka VPP mut ko ka “Voice of the Pynbiej Paidbah” katwa ka NPP mut ko wow Nang Pynphooh Pynphieñ yow Paidbah.
Heiyatoh wa i kyrchaan ka BJP yaka NPP, da ong u, “Du wa ya krehlang i ym em mut wa toh i ki jooh, em i jar jiar ki yurim ym em mut wa lada thap Vote phi cha nga u kylla kur phi chei Dhar, ym em mut wa lada thap Vote phi cha ka Ampareen daw kylla kur phi chei Lyngdoh. U PM i toh uwa stat neibhah da kyrchaan u yaka sorkar MDA neidaw wa yoo u yei krehkaam ko.”
Heiyatoh won wa i chah kynthah ka NPP yei pynman yalang yalap Election ha ka sngi Sunday, u Sniawbhalang da ong u, “Hap i wow burom yeiwa sñiaw ki paidbah, em ki bru kiwa kwah wow pynman Election ha ka sngi Sunday. Ha Jhalupara ki bru kwah ki wow pynman ha ka sngi Sunday, kamtæ hap i wow burom yeini neibhah kam kiwa yahkhmat man i kaamram wow leh yeini wei ymtoh wow kheiñ-ke ya uwon uwon.”
Chooh chooh da ong u wa hanla chah klam boon jait pyrchah ya kani ka sorkar NPP wa yahkhmat da u Conrad K Sangma heiwa ha u snem 2018 heipor wa sdang kiwa boon da ong ki wa kani toh ka sorkar Adhoc wei ym neh ko tangwa katni da em ko la palat 6 snem neidaw wa kreh neibynta ki paidbah.
Discussion about this post