U Returning Officer ka Shillong Parliamentary Constituency (Lok Sabha) da phah u da ka Show Cause Notice cha u President ka Voice of the People Party (VPP) hadien wa yoh ujor wa ha ka 8 tarik uni u bnai heipor wa pynman yalap Election ka NPP ha Jaiaw, Shillong, da em kiwa kyrchaan ka VPP kiwa da wan wow pynthut ya kani ka yalang.
Da ong leh wa kini kiwa kyrchaan ka VPP da kbai wei da pynwit ki hadooh wa hap wow pyndam yaka yalang iwa man leh pyrchah yei krehkaam ka Model Code of Conduct kawa da kdaw wa waroh ki Party, ki kyrtong wa kiwa kyrchaan ymtoh u pynthut ki ya ki yalang paidbah yong kiwi ki Party næ kyrtong.
Ki kyndon da khang ko wow kylli dei ktien næ dei thoh ya kiwa yalap Election hadooh wow saam ya ki kot lakdop yong kiwi ki Party heipor wa pynman yalang yong kiwi ki Party kamjooh heipor wa pynman yei lai paidbah ymtoh wow pynman hei jooh i por wei da khang leh wow khloh ya ki Poster wa da biah da kiwi ki Party.
Kamtæ da e por wow wan pynche u President ka VPP ha næ chwa ka 12 tarik uni u bnai deiwa e leh ki daw wym pynchitom oo katkam ki kyndon ka Model Code of Conduct.
U President ka VPP da ngat u leh sa kawi ka ujor yei pynmih khubor thok pyrchah yaka kyrtong ka NPP lyngba u YouTube wei heiyatoh wa ini da phah wow wan mih u chakhmat ha næ chwa ka 11 tarik uni u bnai.
Discussion about this post